सावनेर येथील रेमंड कॉलनी वासी नागरी सुविधा पासून वंचित, विविध मागण्यासाठी उपविभागीय अधिकारी यांना निवेदन.

अनिल अडकिने सावनेर तालुका प्रतिनिधी
मो. नं. -9822724136

महाराष्ट्र संदेश न्युज ! ऑनलाईन सावनेर:- नागरिकांना मूलभूत सुविधा देण्यासाठी स्थानिक स्वराज्य संस्था म्हणजेच नगर पालिकेची स्थापना करण्यात आली. पण जेव्हा नगर पालिका प्रशासन झोपेचं सोंग घेऊन नागरिकांना सुविधा देण्या ऐवजी त्यांना वाऱ्यावर शोडत असेल तर प्रश्न मांडायचे कुणाकडे असेच चित्र सध्या सावनेर येथील रेमंड कॉलनी प्रभाग क्र.3 येथील नागरिक स्थानिक नगर परिषद प्रशासनाला विचारत आहे.

रेमंड कॉलनी प्रभाग क्र.3 येथील नागरिक नागरी सुविधा पासून बऱ्याच वर्षापासून वंचित असून याकडे प्रशासनाचा डोळेझाक पणा सुरू आहे. नगरपरिषदचे अधिकारी पाहणी करून जातात पण त्यावर कोणत्याही प्रकारची अंमलबजावणी होत नाही. स्थानिक महिलांनी नगर प्रशासनाला बऱ्याचदा निवेदन दिलेले असून प्रशासन कुंभकर्णी झोपेत असल्याचे निदर्शनास येत आहे. नगर परिषदेमध्ये प्रशासन असल्यामुळे कोणताही नगरसेवक ढुंकून सुद्धा पाहत नाही हे विशेष.

या कॉलनीमध्ये रोडची सुविधा नाही, नालीची सुविधा नसल्याने सांडपाणी खाली प्लॉटमध्ये, रोडवर साचलेले आहे. त्यामुळे कॉलनीमध्ये रोगराई पसरत असून दुर्गंधीचा सामना करावा लागत आहे. येथील नागरिकांना नागरी सुविधा उपलब्ध करून देण्याच्या मागणीचे निवेदन नगरपरिषद सावनेर व उपविभागीय अधिकारी अतुल म्हेत्रे सावनेर यांना देण्यात आले. यावेळी सविता येलगंधलवार, विना जाचक, वंदना पेटकर, शिल्पा कुंभारे, वैशाली चापले व शिल्पा कुंभारे इत्यादी महिलांनी निवेदनामार्फत मागणी केली आहे.