जळगाव: पाचोरा येथे 14 वर्षीय अल्पवयीन मुलीवर 7 लोकांनी केला बलात्कार, बालिका गर्भवती.

ईसा तडवी, जळगाव उपजिल्हा प्रतिनिधी

महाराष्ट्र संदेश न्युज ! ऑनलाईन जळगाव:- जिल्हातून एक संतापजनक घटना समोर आली आहे. पाचोरा शहरातील एका 14 वर्षीय अल्पवयीन मुलीचा तरुणांनी विनयभंग करत शारीरिक संबंध प्रस्थापित केले. त्यामुळे ती 14 वर्षीय अल्पवयीन मुलीला गर्भधारणा झाल्याने खळबळ उडाली आहे.

या प्रकरणी पीडित मुलीच्या वृद्ध आजीने पोलिसात दिलेल्या तक्रारीवरून शहरातीलच सात जणांविरुद्ध गुन्हा दाखल करण्यात आला आहे. त्यांच्यासह इतर तीन संशयितांना पोलिसांनी ताब्यात घेतले आहे. पीडित मुलगी 27 एप्रिलला घरातून काही न सांगता निघून गेल्याने तिच्या आजीने नात बेपत्ता झाल्याचे पोलिसांना सांगितले होते.

पोलिस उपनिरीक्षक विजया वसावे यांनी तिचा शहरभर शोध घेतला असता ती 28 एप्रिलला भडगाव रोड भागातील एका हॉटेलमध्ये जेवण करताना आढळून आली. पोलिसांनी तिला ताब्यात घेऊन चौकशी करून तिला जळगाव येथे बालकल्याण समितीकडे रवाना केले होते. तेथील यंत्रणेने तिची वैद्यकीय तपासणी केली असता ती गर्भवती असल्याचे निदान झाल्याने समितीने पाचोरा पोलिसांना माहिती कळवली.

उपनिरीक्षक विजया विसावे यांनी जळगाव येथे जाऊन युवतीची सखोल चौकशी केल्यावर तिने आपबीती कथन केली. पीडितेने संशयित सुमीत कश्यप, संकेत साठे, आकाश वाघ, गणेश भोई, जतिन चनाडे, अतुल महाजन, योगेश पाटील या सात तरुणांनी वेळोवेळी विनयभंग करीत शारिरिक संबंध प्रस्थापित केल्याचे सांगितले. घटनास्थळ आणि घटनेतील संशयितांची ओळख पटविण्यासाठी पीडितेला पाचोरा येथे आणले असता तिने सातही तरुणांची ओळख पटवली.

पीडिता अल्पवयीन असल्याने तिच्या 65 वर्षीय वृद्ध आजीने पोलिसात तक्रार दिली. त्याआधारे पोलिसांनी विनयभंग, सामूहिक बलात्कार आदी कलमांसह पोस्को अंतर्गत सात जणांविरुद्ध गुन्हा दाखल केला असून, त्यांच्यासह आणखी तीन जणांना ताब्यात घेतले आहे. उपविभागीय पोलिस अधिकारी अभयसिंग देशमुख तपास करीत आहेत.