गडचिरोली जिल्हातील सुरजागड लोहखाणीत भीषण अपघात, 26 वर्षीय अभियंत्यासह तिघांचा जागीच मृत्यू.

मधुकर गोंगले, गडचिरोली जिल्हा प्रतिनिधी

महाराष्ट्र संदेश न्युज ! ऑनलाईन गडचिरोली:- जिल्हातील एटापल्ली तालुक्यातील सुरजागड येतून एक भीषण अपघाताची घटना समोर आली आहे. येथील लोहखाण उत्खनन करताना अपघात झाल्याने तरुण अभियंत्यासह दोन परप्रांतीय मजूर असे एकूण तिघे जण ठार झाले. ही घटना 6 ऑगस्टला सायंकाळी साडेसहा वाजता घडली. ही घटना समोर येताच संपूर्ण लोहखाण उत्खनन परिसरात शोककळा पसरली आहे. सोनल रामगीरवार वय 26 वर्ष, नागेपल्ली ता. अहेरी यांच्यासह हरीयाणातील दोन मजुरांचा समावेश आहे. हरीयाणातील मृतांची अद्याप ओळख पटलेली नाही. त्यांची ओळख पटविण्याचे काम सुरू आहे.

एटापल्ली तालुक्यातील सुरजागड पहाडीवर लॉयड मेटल्स कंपनीकडून लोह उत्खनन सुरू आहे. या पहाडीवरून उत्खनन करणारे वाहन खाली कोसळले, हे वाहन खाली उभ्या असलेल्या जीपवर आदळले. तेथे उभे असलेले अभियंता सोनल रामगीरवार व अन्य दोघे ठार झाले. दरम्यान, या घटनेनंतर तिघांनाही तातडीने अहेरी येथील उपजिल्हा रुग्णालयात दाखल करण्यात आले, वैद्यकीय अधिकाऱ्यांनी तपासणी करून त्यांना मृत घोषित केले. या घटनेने एटापल्ली, आलापल्ली, अहेरीत तणाव निर्माण झाला असून मोठा पोलिस बंदोबस्त तैनात करण्यात आला आहे.

वर्षभरपूर्वीच झाला होता विवाह: या अपघातात मृत्यू झालेल्या तरुण अभियंता सोनल रामगीरवार यांचा वर्षभरापूर्वीच विवाह झाला होता. त्यांच्या कुटुंबियांना या घटनेची माहिती मिळताच त्यांच्यावर दुःखाचा डोंगर कोसळला आहे. नातेवाईकांच्या आक्रोशाने वातावरण सुन्न झाले होते.