पुण्यात येरवडा परिसरात धारदार शस्त्राने वार करुन जबरदस्तीने पैसे लुटले, पोलिसांनी 5 आरोपींना ठोकल्या बेड्या.

नरेंद्र नायडू पुणे शहर प्रतिनिधी

महाराष्ट्र संदेश न्युज ! ऑनलाइन पुणे:- शहरातील येरवडा परिसरातून एक खळबळजनक घटना समोर आली आहे. धारदार शस्त्राने वार करुन जबरदस्तीने 90 हजार रुपये लुटण्यात आले. त्यानंतर आरोपी घटना स्थळावरून पळून गेले. या आरोपींना येरवडा पोलिसांनी अवघ्या दोन तासात बेड्या ठोकल्या आहेत. ही घटना 14 सप्टेंबर रोजी येरवडा परिसरातील चिमाघाट येथील ब्रिजखाली घडली होती.

आरोपी आकाश हनुमंत भंडारी उर्फ दशरथ वय 23 वर्ष रा. वडारवस्ती, येरवडा, अनुज सोमनाथ जोगदंड वय 19 वर्ष रा. ताडीगुत्ता, येरवडा, योगेश दिलीप नवघणे वय 30 वर्ष रा. गोकुळ नगर, कोंढवा, सलमान फारुख कुरेशी वय 23 वर्ष रा. शनी अळी, येरवडा, शिवकुमार संजय शेलार वय 22 वर्ष रा. भाडी मंडई, येरवडा अशी अटक करण्यात आलेल्या आरोपींची नावे आहेत. याबाबत मुकेश सपकाळ यांनी येरवडा पोलीस ठाण्यात फिर्याद दिली आहे. पोलिसांनी आयपीसी 394, 395, 397, 120 (ब), 34 नुसार गुन्हा दाखल केला आहे.

घटनेच्या दिवशी फिर्यादी मुकेश सपकाळ हे त्यांच्या मित्रासह चिमाघाट येथील ब्रिज खाली बसले होते. त्यावेळी आरोपींनी फिर्यादी यांच्यावर धारदार शस्त्राने वार करुन खिशातील 90 हजार रुपये काढून घेऊन पळून गेले होते. पोलिसांनी आरोपींवर दरोड्याचा गुन्हा दाखल करुन शोध सुरु केला. आरोपींचा शोध घेत असताना पोलीस अंमलदार राहुल परदेशी, दत्तात्रय शिंदे, प्रशांत कांबळे यांना माहिती मिळाली, दरोड्याच्या गुन्ह्यातील आरोपी येरवडा येथे येणार आहेत. पोलिसांनी आरोपींना शिताफीने पकडून चौकशी केली असता त्यांनी गुन्ह्याची कबुली दिली आहे. पुढील तपास पर्णकुटी पोलीस चौकीचे सहायक पोलीस निरीक्षक महेश लामखेडे करीत आहेत.

ही कारवाई पोलीस आयुक्त रितेश कुमार, पोलीस सह आयुक्त संदीप कर्णिक, अपर पोलीस आयुक्त पूर्व प्रादेशिक विभाग रंजनकुमार शर्मा, पोलीस उपायुक्त शशिकांत बोराटे, येरवडा विभागाचे सहायक पोलीस आयुक्त संजय पाटील, वरिष्ठ पोलीस निरीक्षक बाळकृष्ण कदम, पोलीस निरीक्षक गुन्हे कांचन जाधव, जयदिप गायकवाड यांच्या मार्गदर्शनाखाली पोलीस उपनिरीक्षक अंकुश डोंबाळे, पोलीस उपनिरीक्षक प्रदीप सुर्वे, पोलीस अंमलदार गणपत थिकोळे, दत्ता शिंदे, तुषार खराडे, किरण घुटे, अमजद शेख, सागर जगदाळे, कैलास डुकरे, प्रविण खाटमोडे, अनिल शिंदे, राहुल परदेशी, सुरज ओंबासे, दत्तात्रय शिंदे, प्रशांत कांबळे, सुशांत भोसले, अजित वाघुले यांच्या पथकाने केली.