नगर: फिल्मी स्टाईलने केलेल्या या खुनाचा स्थानिक गुन्हे शाखेने अखेर सात महिन्यांनंतर लावला छळा, दोन आरोपींना ठोकल्या बेळ्या.

✒️ विश्वास त्रिभुवन, अहमदनगर जिल्हा प्रतिनिधी

अहमदनगर/ वाळकी :- येथून एक खळबळजनक घटना समोर आली आहे. पैसे उसने देण्याच्या बहाण्याने 25 वर्षीय तरूणाला बोलावून घेत त्याला जास्त दारू पाजली. त्यानंतर त्याला मोटारसायकलवर बसवून श्रीगोंदा तालुक्यातील कुकडी कॅनॉलजवळ नेऊन पाण्यात फेकून देत त्याची हत्या करण्यात आली.

हे हत्याकांड अतिशय थंड डोक्याने कट रचत, फिल्मी स्टाईलने केलेल्या या खुनाला नगरच्या स्थानिक गुन्हे शाखेच्या पथकाने अखेर सात महिन्यांनंतर वाचा फोडली असून, दोघांच्या मुसक्या आवळल्या आहेत. सागर कुमार झरेकर वय 25 वर्ष रा. घोसपुरी ता. नगर असे मयत तरूणाचे नाव आहे. तो दि.14 जानेवारी 2022 पासून घरातून गायब झाला होता. त्याच्या घरच्यांनी नगर तालुका पोलिस ठाण्यात हरवल्याची तक्रार दाखल केली होती. त्याचा दोघांनी खून केला असल्याची माहिती तब्बल 7 महिन्यांनंतर समोर आली असून, स्थानिक गुन्हे शाखेच्या पथकाने विश्वनाथ ऊर्फ सुशांत सोपान भापकर वय 28, रा.भापकर वस्ती, कोळगाव ता. श्रीगोंदा व त्याचा मित्र गौरव गोरक्ष साके वय 20 रा. साकेवाडी, ता. श्रीगोंदा या दोघांना जेरबंद केले.

या खून प्रकरणाची पोलिस सूत्रांकडून मिळालेली माहिती अतिशय धक्कादायक आहे. मयत सागर झरेकर व आरोपी विश्वनाथ ऊर्फ सुशांत भापकर यांची ओळख होती. काही वर्षांपूर्वी मयत सागरच्या नातेवाईक तरूणीचे श्रीगोंदा तालुक्यातील एका गावात लग्न झाले. मात्र, आरोपी भापकर तिला प्रेमसंबंध ठेवण्यासाठी त्रास देत होता. परंतु, तिने त्यास नकार दिला. तिला अद्दल घडविण्यासाठी आरोपी भापकर याने प्रयत्न केले. अनेकदा त्रास दिल्यानंतर तिचे आयुष्य उद्ध्वस्त करण्याचाही त्याने प्रयत्न केला.

पुढे त्याने तिचा नातेवाईक असलेल्या सागर याच्या खुनाचा कट रचला. त्यासाठी मित्र गौरव साके यास 50 हजारांची सुपारी दिली. एक दिवस सागरला पैशांची अडचण असल्याने त्याने आरोपी भापकरला सांगितले. त्याने नियोजित कटानुसार दि.14 जानेवारी 2022 रोजी रात्री त्याला चिखली घाटात बोलावले. तेथे घाटाच्या बाजूस असलेल्या फॉरेस्टमध्ये सागरला नेऊन त्यास जास्त प्रमाणात दारू पाजली. नंतर दोघे त्यास मोटारसायकलवर बसवून श्रीगोंदा तालुक्यातील मोहरवाडी गावाच्या शिवारात घेऊन गेले. रात्री 9.30 च्या सुमारास त्याला कुकडी कॅनॉलच्या पाण्यात फेकून दिले.