राष्ट्रवादी काँग्रेस शरद पवारला मोठा धक्का, वर्धा लोकसभा मतदार संघातून या नेत्यांनी घेतली माघार.

मुकेश चौधरी कार्यकारी संपादक

महाराष्ट्र संदेश न्यूज ! ऑनलाईन वर्धा:- लोकसभा निवडणुकीची आचारसंहिता लागू होण्यापूर्वीच राष्ट्रवादीच्या शरद पवार गटाला मोठा धक्का बसला आहे. गेल्या काही दिवसांपासून जिल्ह्याच्या राजकारणात सक्रिय असलेले माजी मंत्री हर्षवर्धन देशमुख यांनी निवडणुकीच्या मैदानातून माघार घेतली आहे. शरद पवार यांची भेट घेतल्यानंतर त्यांनी त्यांचा निर्णय सांगितला. त्यांनी स्वतः याला दुजोरा दिला आहे.

वर्धा लोकसभा मतदारसंघात राष्ट्रवादी काँग्रेसच्या शरद पवार गटाने दावा केला आहे की, शरद पवार यांनीच माजी मंत्री हर्षवर्धन देशमुख यांना तयारी करण्याच्या सूचना दिल्या होत्या. त्यानंतर देशमुख जिल्ह्याच्या राजकारणात सक्रिय झाले आणि त्यांनी संपर्क मोहीम तीव्र केली. हर्षवर्धन देशमुख सक्रिय झाल्यानंतर राष्ट्रवादीतील एक गट त्यांच्या विरोधात उभा राहिला.

माजी आमदार सुरेश देशमुख यांचे पुत्र समीर देशमुख आणि माजी आमदार राजू तिमांडे यांनी वर्धा लोकसभा मतदारसंघावर दावा केला होता. त्यामुळे राष्ट्रवादीतील परस्पर राजकारण शिगेला पोहोचले होते. समीर देशमुख यांनी स्वतःला मोठा दावेदार सांगून हर्षवर्धन देशमुख यांना आव्हान दिले होते. दरम्यान, लोकसभा मतदारसंघ राष्ट्रवादीच्या कोट्यात गेल्याची चर्चा सुरू झाल्यानंतर काँग्रेसचे स्थानिक नेते सक्रिय होऊन मतदारसंघ काँग्रेसकडे ठेवण्यासाठी आक्रमक झाले.

माजी आमदार अमर काळे, नरेशचंद्र ठाकरे, काँग्रेस प्रदेश उपाध्यक्षा चारुलता टोकस, शेतकरी आरक्षणाचे प्रणेते शैलेश अग्रवाल, वर्ध्याचे सुपुत्र नगराध्यक्ष शेखर शेंडे यांनी प्रदेशाध्यक्ष नाना पटोले, बाळासाहेब थोरात, राष्ट्रीय अध्यक्ष मल्लिकार्जुन खर्गे यांची भेट घेऊन मतदारसंघ काँग्रेसकडे ठेवण्याची विनंती केली होती. हर्षवर्धन देशमुख सक्रिय झाल्यानंतर जिल्ह्यातील राजकीय घडामोडी वेगाने बदलू लागल्या. ज्याची कल्पना खुद्द हर्षवर्धन यांनीच केली होती.

पक्षश्रेष्ठींचा असहकार आणि काँग्रेसचा नकार यामुळे परिस्थिती आणखी बिकट होणार हे लक्षात आल्यानंतर हर्षवर्धन देशमुख यांनी मुंबईत जाऊन शरद पवार यांची भेट घेतली. त्यांना जिल्ह्यातील राजकीय घडामोडींची माहिती दिल्यानंतर त्यांनी स्वत: लढण्यास इच्छुक नसल्याचे सांगितले.

परिस्थितीनुसार निर्णय: जिल्ह्याच्या सध्याच्या राजकारणाचा अभ्यास केला आहे. परिस्थिती अनुकूल नाही. या संपूर्ण परिस्थितीचा विचार करून पक्षप्रमुख शरद पवार यांना निवडणूक न लढवण्याबाबत कळविण्यात आले आहे. असे हर्षवर्धन देशमुख यांनी सांगितले.