पोलिस नाकाबंदी दरम्यान ट्रकने पोलिस हवालदार यांना चिरडले, डोक्याला जबर मार लागल्याने जागीच मृत्यू.

नांदेड जिल्हा प्रतिनिधी

महाराष्ट्र संदेश न्युज ! ऑनलाईन नांदेड:- येथून एक खळबळजनक घटना समोर आली आहे. येथील नागपूर राष्ट्रीय महामार्ग 361 वरील दोन जिल्ह्याच्या व तीन तालुक्याच्या सीमेवर चोरंबा फाटा येथे नाकाबंदी दरम्यान एका ट्रकने पोलिस हवालदार याला चिरडल्याची घटना घडली आहे. पोलिस कर्मचाऱ्याच्या डोक्याला जबर मार लागल्याने जागीच मृत्यू झाला. ही घटना शनिवारी दि. 1 जूनला दुपारी दोनच्या सुमारास ही घटना घडली आहे. अर्धापूर पोलिस ठाण्याचे पोलिस हवालदार राम मुगाजी पवार यांचा मृत्यू झाला आहे. या अपघात प्रकरणी अर्धापूर पोलिस ठाण्यात ट्रक आणि पिकअप या दोन्ही वाहन चालकांवर गुन्हे दाखल करण्यात आले असून, पोलिस पुढील तपास करत आहेत.

प्राप्त माहितीनुसार, नांदेड-नागपूर राष्ट्रीय महामार्गावरील चोरंबा फाटा हे दोन जिल्हे आणि तीन तालुके असलेल्या पॉईंटवर मागील काही दिवसांपासून नाकाबंदी चौकी उभारण्यात आली आहे. नागपूर मार्गाकडून येणाऱ्या प्रत्येक वाहनाची तपासणी करण्यात येत होती. पोलिस हवालदार राम पवार हे शनिवारी पिकअप क्रमांक MH 20 EG 7844 या वाहनाची तपासणी करीत असताना पाठीमागून आलेला ट्रक क्रमांक RJ 09 GC 9945 ट्रकने पोलिस हवालदार राम पवार यांना उडविले. यात ते गंभीर जखमी झाले. त्यांच्या डोक्याला मार लागल्याने त्यांना राष्ट्रीय महामार्ग पोलिस केंद्र वसमत फाटा येथील रुग्णवाहिकेने ग्रामीण रुग्णालय अर्धापूर येथे उपचारासाठी दाखल करण्यात आले. डॉक्टरांनी तपासणी करून त्यांना मृत घोषित केले.

दरम्यान, या घटनेची माहिती मिळताच पोलिस अधीक्षक अप्पर पोलिस अधीक्षक, उपविभागीय पोलिस अधिकारी नांदेड ग्रामीण यांनी घटनास्थळी भेट देऊन घटनेची माहिती घेऊन पिकअप व ट्रक पोलिसांनी ताब्यात घेतला आहे. या अपघात प्रकरणी अर्धापूर पोलिस ठाण्यात ट्रक आणि पिकअप या दोन्ही वाहन चालकावर आणि वाहनावर गुन्हा दाखल करण्यात आले आहेत. पोलिस पुढील तपास करत आहेत.