पुण्यात एका महिला पोलीस कर्मचाऱ्याचा गळा आवळून हत्या करण्याचा प्रयत्न, कशी तरी सुटका करुन घेत वाचवला जीव.

पुणे जिल्हा प्रतिनिधी

महाराष्ट्र संदेश न्युज ! ऑनलाईन पुणे:- पुण्यातील विश्रांतवाडी परिसरातून एक खळबळजनक घटना समोर आली आहे. येथे चारित्र्याच्या संशयावरुन एका महिला पोलीस असलेल्या पत्नीचा गळा आवळून तिची हत्या करण्याचा प्रयत्न करण्यात आल्याची घटनेने संपूर्ण पुणे शहरात खळबळ उडाली आहे. याप्रकरणी विश्रांतवाडी पोलिसांनी महिलेच्या पतीला अटक केली आहे. हर्षद विकास पानसरे वय 36 वर्ष, रा. पोलीस लाईन, विश्रांतवाडी असे अटक केलेल्या पतीचे नाव आहे. याप्रकरणी 32 वर्षाच्या महिलेने पोलीस स्टेशन मध्ये फिर्याद दिली आहे. ही घटना शनिवारी पहाटे 5.00 वाजताच्या सुमारास विश्रांतवाडी येथील त्यांच्या घरात घडली आहे.

प्राप्त माहितीनुसार, पोलीस कर्मचारी असलेली फिर्यादी महिला आणि आरोपी हर्षद पानसरे यांचे दोन वर्षांपूर्वी लग्न झाले आहे. हर्षद हा एका कंपनीत काम करतो. विश्रांतवाडी पोलीस लाईनमध्ये ते दोघे राहण्यास आहेत. हर्षद हा फिर्यादींच्या चारित्र्याचा संशय घेऊन शिवीगाळ करून बदनामीकारक मेसेज पाठवून सतत वाद घालत असे. शनिवारी पहाटे त्याने फिर्यादीसोबत वाद करुन त्यांना गादीवर ढकलून, मी तुझा जीवच घेतो, असे म्हणून फिर्यादी महिलेचा गळा आवळून तिची हत्या करण्याचा प्रयत्न केला.

या दरम्यान महिलेने पतीच्या तावडीतून कशी तरी आपली सुटका करुन घेत पोलिसांशी संपर्क साधला. ही माहिती मिळताच पोलीस तातडीने घटनास्थळी दाखल झाले व त्यांनी हर्षद पानसरे याला ताब्यात घेतले. पुढील तपास विश्रांतवाडी पोलीस करत आहेत.