नितीन शिंदे, मुंबई महानगर प्रतिनिधी
महाराष्ट्र संदेश न्युज ! ऑनलाईन कल्याण:- शहरातील प्रबोधनकार ठाकरे सरोवर म्हणजेच भगव्या तलावाचे सुशोभिकरण आणि मलशुद्धीकरण केंद्र आंबिवली, मलशुध्दीकरण केंद्र वाडेघर आणि बी.एस.यु.पी. अंतर्गत बांधलेल्या सदनिकांचे प्रकल्पबाधितांना वाटप, अशा विविध विकासकामांचा लोकार्पण सोहळा आज कल्याण येथील यशवंतराव चव्हाण मैदानात आयोजित करण्यात आला होता.
यावेळी प्रबोधनकार ठाकरे तलाव अर्थात भगवा तलाव नूतनीकरण कामाचे लोकार्पण करण्यात आले. या तलावातील अतिशय सुंदर आणि नेत्रदीपक असे वॉटर लेझर शोचे उद्घाटन देखील याप्रसंगी करण्यात आले. दिव्यांग बांधवांना यासमयी व्हीलचेअरचे वाटप करण्यात आले.
कल्याण हे ऐतिहासिक शहर असून या शहराच्या विकासासाठी कुठलाही निधी कमी पडू देणार नाही. कल्याण पश्चिम व कल्याण पूर्व येथे दोन सुपर स्पेशलिटी हॉस्पिटल्स उभारावीत यासाठी नगर विकास विभागाच्या माध्यमातून व शासनाच्या माध्यमातून सर्वतोपरी मदत करू अशी ग्वाही दिली. कल्याणकरांची मेट्रोची मागणी मागणी लक्षात घेऊन मेट्रो१२ चा आराखडा तयार करण्याच्या सूचना संबंधित प्रशासनाला दिल्या. चांगल्या घरात रहायला मिळावे हे प्रत्येकाचे स्वप्न असते आज बीएसयुपी योजनेतील घरकुले ५०० कुटूंबाना देता आली याचे विशेष समाधान वाटत असल्याचे मनोगत यावेळी बोलताना व्यक्त केले.
याप्रसंगी केंद्रीय पंचायतराज राज्यमंत्री कपिल पाटील, खासदार डॉ. श्रीकांत शिंदे, आमदार गणपत गायकवाड, माजी आमदार नरेंद्र पवार, आमदार किशोर दराडे, आमदार ज्ञानेश्वर म्हात्रे, ठाण्याचे जिल्हाधिकारी अशोक शिनगारे, कल्याण डोंबिवली मनपा आयुक्त भाऊसाहेब दांगडे, तसेच उपजिल्हाप्रमुख राजेश कदम, बदलापूर शहरप्रमुख वामन म्हात्रे, कल्याण शहर प्रमुख आणि माजी नगरसेवक महेश गायकवाड, विधानसभा प्रमुख आणि माजी नगरसेवक निलेश शिंदे, तालुका प्रमुख महेश पाटील, माजी नगरसेवक मल्लेश शेट्टी, माजी नगरसेवक नवीन गवळी, प्रशांत काळे, रवी पाटील, अण्णा रोकडे, छाया वाघमारे, संजय मोरे आणि कल्याण डोंबिवली मधील बाळासाहेबांची शिवसेना पक्षाचे सर्व पदाधिकारी आणि सहकारी तसेच नागरिक मोठ्या संख्येने उपस्थित होते.
