राज शिर्के, मुंबई शहर प्रतिनिधी
महाराष्ट्र संदेश न्युज ! ऑनलाईन मुंबई: लोकसभा निवडणुकीसाठी इंडिया आघाडीनं डिसेंबरच्या अखेरपर्यंत जागावाटपाची डेडलाईन निश्चित केली होती. पण अद्याप तरी एकाही राज्यातील जागावाटपाचा फॉर्म्युला निश्चित झालेला नाही. महाराष्ट्रात लोकसभेच्या ४८ जागा आहेत. एबीपी सी व्होटरच्या सर्वेक्षणानुसार राज्यात महाविकास आघाडीला २६ ते २८ जागा मिळण्याचा अंदाज आहे. तर सत्ताधारी महायुतीला १९ ते २१ जागा मिळू शकतात. त्यामुळे महाविकास आघाडीचं पारडं जड असताना काँग्रेस मोठा डाव टाकण्याच्या तयारीत असल्याचं दिसतंय.
काँग्रेसनं राज्यातील सर्वच्या सर्व ४८ जागांसाठी तयारी सुरू केली आहे. जागावाटपाचा विषय चर्चेत असताना, उद्धव ठाकरे गटानं २३ जागांची मागणी केलेली असताना, वंचित बहुजन विकास आघाडी १२ जागांसाठी आग्रही असताना काँग्रेसनं ४८ जागांवरील इच्छुकांची नावं मागवली आहेत. त्यामुळे महाविकास आघाडीतील अन्य घटक पक्षांमध्ये चलबिचल सुरू झाली आहे. लोकसभा निवडणूक इच्छिणाऱ्या नेत्यांनी आपापली नावं द्यावीत, असं काँग्रेसकडून सांगण्यात आलं आहे.
महाविकास आघाडीतील पक्षांचं जागावाटप अंतिम टप्प्यात असल्याची माहिती शिवसेना उद्धव बाळासाहेब ठाकरे गटाचे खासदार संजय राऊत यांनी दिली. प्रकाश आंबेडकरांच्या वंचित बहुजन आघाडीसोबतही चर्चा सुरू असल्याचं ते म्हणाले. महाविकास आघाडीतील पक्षांमध्ये कोणतंही मतभेद नाहीत. काँग्रेस आणि राष्ट्रवादीला वंचितबद्दल कोणताही आक्षेप नाही, असंही राऊत यांनी सांगितलं
सुत्रांच्या हवाल्यानं दिलेल्या वृत्तानुसार, महाराष्ट्र काँग्रेसचे प्रदेशाध्यक्ष नाना पटोले आणि वरिष्ठ नेते बाळासाहेब थोरात यांनी ३ जानेवारीला नवी दिल्लीत पक्षाध्यक्ष मल्लिकार्जुन खरगे आणि खासदार राहुल गांधींची भेट घेतली. यानंतर पटोलेंनी राज्यातील सर्व शहर आणि जिल्हा अध्यक्षांना इच्छुक उमेदवारांची नावं पाठवण्याच्या सूचना केल्या. त्यामुळे आगामी लोकसभा निवडणूक काँग्रेस स्वबळावर लढवणार का अशी चर्चा सुरू झाली.
काँग्रेसनं ४८ जागांसाठी इच्छुकांची नावं मागवणं दबावतंत्राचा भाग असू शकतो. ठाकरेंची शिवसेना २३ जागांसाठी आग्रही आहे. तर वंचितच्या आंबेडकरांनी १२ जागांची मागणी केली आहे. त्यामुळे मित्रपक्षांवर दबाव आणण्यासाठी काँग्रेसनं ४८ जागांसाठी उमेदवारांची नावं मागवलेली असू शकतात. शिवसेना २३ जागा लढवणार असेल तर मग आम्ही काय करायचं, असा सवाल काही दिवसांपूर्वीच काँग्रेसचे माजी खासदार संजय निरुपम यांनी विचारला होता.
२०१९ ची लोकसभा निवडणूक शिवसेना, भाजप युतीनं लढवली. त्यांच्यासमोर काँग्रेस, राष्ट्रवादी काँग्रेसचं आव्हान होतं. ठाकरेंच्या नेतृत्त्वाखाली शिवसेनेनं १८ जागा जिंकल्या होत्या. तर राष्ट्रवादीनं ४ आणि काँग्रेसनं १ जागा जिंकली होती. काँग्रेसचे एकमेव खासदार बाळू धानोरकर यांचं गेल्या वर्षी निधन झालं. त्यामुळे सध्या राज्यात काँग्रेसची पाटी कोरी आहे. तर पक्षफुटीमुळे शिवसेना, राष्ट्रवादीची ताकद कमी झाली आहे.
