उमेश इंगळे अकोला जिल्हा प्रतिनिधी
महाराष्ट्र संदेश न्युज ! ऑनलाईन अकोला:- नोंद कुळाच्या अभिलेखावर करण्यासाठी २० हजार रुपयांची लाच स्वीकारणाऱ्या मंडळ अधिकाऱ्यावर अमरावती येथील लाच लुचपत प्रतिबंधक विभागाच्या अधिकाऱ्यांनी सापळा रचून कारवाई केली आहे. महादेव उत्तमराव भगत (वय ४५ वर्ष असे ताब्यात घेतलेल्या मंडळ अधिकाऱ्याचे नाव आहे. ही कारवाई ता.१७ जानेवारी रोजी शहरातील रसिक ॲटोमोबाईल दुकानच्या बाजूला, चांदेकर चौकात करण्यात आली आहे. या कारवाईमुळे महसूल विभागात खळबळ उडाली आहे.
या संदर्भात प्राप्त माहितीनुसार तक्रारदार व गैरअर्जदार राजेश ताले यांच्या शेतीच्या मालकी हक्काबाबत वाद सुरू आहे. दरम्यान अकोला तहसीलदारांच्या आदेशानुसार तक्रारदाराच्या नावावर झालेल्या शेतीच्या कुळाच्या अभिलेखावर नोंद घेण्यासाठी तसेच तक्रारदार यांच्या शेत मालकीच्या वादाबाबतच्या प्रकरणातील गैरअर्जदार राजेश ताले यांचा अर्ज किंवा त्या बाबतचा आदेश आल्यास सातबाऱ्यावर त्याची नोंद न घेण्याच्या मोबदल्यात मंडळ अधिकारी महादेव भगत यांनी तक्रारदाराकडून ३० हजार रुपयांची लाच मागितली होती.
२० हजार रुपयांची लाच घेताना अमरावती येथील लाचलुचपत प्रतिबंधक विभागाने अटक केली आहे. ही कारवाई अमरावती येथील लाचुचपत प्रतिबंधक विभागाचे पोलीस अधीक्षक मारुती जगताप, अप्पर पोलीस अधीक्षक देविदास घेवारे यांच्या मार्गदर्शनाखाली पोलीस निरीक्षक श्रीमती विजया पंधरे, पोलीस निरीक्षक केतन मांजरे, पो. अंमलदार चंद्रकांत जनबंधू, उपेंद्र थोरात, वैभव जायले यांनी केली आहे.
