हनिशा दुधे, चंद्रपूर जिल्हा ग्रामीण प्रतिनिधी
महाराष्ट्र संदेश न्युज ! ऑनलाईन चंद्रपूर:- राज्यात मराठा आरक्षण सर्वेक्षण मोठ्या प्रमाणात सुरू आहे. त्यात चंद्रपूर महानगर पालिकेच्या वतीने महाराष्ट्र राज्य मागासवर्ग आयोगाच्या निर्देशा नुसार मराठा समाज व खुल्या प्रवर्गातील सामाजिक, शैक्षणिक मागासलेपण तपासण्या साठी सर्वेक्षण केले. यामध्ये 4 हजार 909 घरे बंद मिळून आली असून, 488 कुटुंबीयांनी सर्वेक्षणास माहिती देण्यास नकार दिला. त्यामुळे चंद्रपूर येथे फक्त 93.27 टक्के कुटुंबांची माहिती गोळा झाली आहे.
मराठा आरक्षणावर संदर्भात चंद्रपूर शहरात 23 जानेवारी 2024 पासून मराठा व खुल्या प्रवर्गातील समाजाचे सर्वेक्षण सुरू करण्यात आले होते. हे सर्वेक्षण 2 फेब्रुवारीला पूर्ण झाले. चंद्रपूर शहरातील 80 हजार 951 कुटुंबांचे सर्वेक्षण करण्यासाठी सुमारे 874 पेक्षा जास्त कर्मचारी कार्यरत होते. या सर्वेक्षणाचे उद्दिष्ट गाठून 3 फेब्रुवारी रोजी चंद्रपूर मराठा व खुल्या प्रवर्गातील समाजाचे सर्वेक्षणाचे काम पूर्ण करण्यात आले, अशी माहिती महानगर पालिका उपायुक्त अशोक गराटे यांनी दिली.
राज्य मागासवर्ग आयोगाने पाठविलेल्या मास्टर ट्रेनरने महानगरपालिकेतील नोडल अधिकारी, सहायक नोडल अधिकारी आणि मास्टर ट्रेनर यांना प्रशिक्षण दिले होते. त्यानंतर महानगरपालिकेचे नोडल अधिकारी, सहायक नोडल अधिकारी आणि मास्टर ट्रेनर यांनी महानगर पालिकेच्या कर्मचाऱ्यांना सर्वेक्षणा बाबतचे प्रशिक्षण दिले होते.
