मधुकर गोंगले, गडचिरोली जिल्हा प्रतिनिधी
महाराष्ट्र संदेश न्युज ! ऑनलाईन गडचिरोली:- एटापल्ली तालुक्यातील सुरजागड पारंपरिक इलाकातील गर्देवाडा ग्रामसभा अंतर्गत दमकोंडवाही येथे आयोजित पारंपरिक जत्रा दिनांक १४ ते १५ फेब्रुवारी ला यशस्वीरित्या संपन्न झाली, असून या जत्रेला इलाका प्रमुख सैनू गोटा, तालुका सचिव (सीपीआय) कॉम्रेड सचिन मोतकुरवार, गर्देवाडा ग्रामसभा प्रमुख रमेश कावडो, कॉम्रेड विशाल पूजजलवार (सीपीआय), कॉम्रेड सूरज जककुलवार (सीपीआय), कॉम्रेड शरीफ शेख (सीपीआय) आणि असंख्य नागरिक मोठया प्रमाणात उपस्थित होते.
या जत्रेच्या दुसऱ्या दिवशी, दिनांक १५ फेब्रुवारी रोजी सकाळी गडपूजा आयोजित करण्यात आली होती. त्यानंतर दुपारी खदान विरोधी चर्चा बैठक आयोजित करण्यात आली. या बैठकीत इलाख्यातील खदान प्रकल्पांमुळे होणाऱ्या नकारात्मक परिणामांवर चर्चा करण्यात आली.
या बैठकीत उपस्थित ग्रामस्थांनी खदान प्रकल्पां मुळे होणाऱ्या प्रदूषण, जंगलतोड आणि स्थानिक लोकांच्या जीवनावर होणाऱ्या नकारात्मक परिणामां बद्दल आपली चिंता व्यक्त केली.
या चर्चेनंतर खदान प्रकल्पांना विरोध करण्याचा आणि पर्यावरण आणि स्थानिक लोकांच्या हिताचे रक्षण करण्याचा एकमताने निर्णय घेण्यात आला.
या जत्रेमध्ये खालील प्रमुख कार्यक्रमांचा समावेश होता:
• पारंपरिक गड पूजा
• सांस्कृतिक कार्यक्रम
• सामूहिक भोजन
• खदान विरोधी चर्चा बैठक
• ग्रामसभा
या जत्रेमुळे इलाख्यातील लोकांमध्ये एकात्मता आणि बंधुभाव निर्माण झाला. तसेच खदान प्रकल्पांविरोधात आवाज उठवण्यासाठी लोकांना प्रेरणा मिळाली.
