*युवकांमध्ये एक नवीन उत्साह निर्माण करणे हा स्पर्धेचा उद्देश.
पद्मश्री डॉ.परशुराम खुणे यांची उपस्थिती*
मधुकर गोंगले, गडचिरोली जिल्हा प्रतिनिधी.
मो. नं. 9420751809.
एटापल्ली, लॉयड्स मेटल्स् अँड एनर्जी लिमिटेड लोहखाण सुरजागडच्या वतीने हेडरी येथे मिनी मॅरेथॉन स्पर्धेचे आयोजन करण्यात आले होते. यात मोठ्या संख्येने युवा वर्ग सहभागी झाला होता.
मॅरेथॅानच्या सुरवातीला पद्मश्री डॉ.परशुराम खुणे यांनी मार्गदर्शन करताना, महाराष्ट्र राज्याच्या टोकावरील नक्षलग्रस्त असलेल्या गडचिरोली जिल्हयातील एटापल्ली तालुक्यात सुरजागडसारखी मोठी लोहखाण आणि प्रकल्प सुरू करून बेरोजगार लोकांना संधी उपलब्ध करून दिल्याबद्दल लॉयड्स मेटल्स अँड एनर्जी लि.चे व्यवस्थापकीय संचालक बी.प्रभाकरन यांचे आभार मानले. लॉयड्सकडून मिनी मॅरेथॉन स्पर्धेचे आयोजन करणे ही एक उत्कृष्ट कल्पना आहे. कर्मचारी आणि त्यांच्या कुटुंबांमध्ये आरोग्य जागरूकता वाढवणे आणि युवकांमध्ये एक नवीन उत्साह निर्माण करणे हा स्पर्धेचा उद्देश असल्याने या स्पर्धेमध्ये सर्वांनी सहभाग घेवून आपले आरोग्य सुदृढ राहण्यासाठी प्रयत्न करावे, असे आवाहन त्यांनी यावेळी केले.
लॉयड्स मेटल्सचे व्यवस्थापकीय संचालक बी.प्रभाकरन यांच्या प्रमुख उपस्थितीत या मिनी मॅरेथॅानचा शुभारंभ पद्मश्री डॉ.परशुराम खुणे यांच्या हस्ते हिरवी झेंडी दाखवून करण्यात आला. सदर मिनी मॅरेथॉन वयाच्या गटानुसार घेण्यात आल्याने 18 ते 55 या वयोगटातील कंपनीच्या सर्व महिला–पुरुष अशा 1300 कर्मचाऱ्यांनी सहभाग घेतला.
या स्पर्धेत सहभाग घेणाऱ्या सर्व कर्मचाऱ्यांना गटानुसार टी-शर्टचे वितरण केले होते. ही मॅरेथॉन सीएसआर कॉम्प्लेक्स हेडरीपासून लोहखाण सुरजागडपर्यंत 5 किमी अंतरात घेण्यात आली. सहभागी सर्व स्पर्धकांना मॅरेथॉनच्या मार्गावर ग्लुकोज, फळं देण्यात आली.
“विजेत्यांना शिल्ड आणि मेडल”
समारोपीय कार्यक्रमाचे प्रमुख पाहुणे म्हणून पुरसलगोंदीच्या सरपंच अरुणा सडमेक, उपसरपंच राकेश कवडो, तोडसाच्या सरपंच वनिता कोरामी, नागुलवाडीचे सरपंच नेवलु पाटील गावडे, तोडसा ग्रा.पं.चे सदस्य विनोद नरोटे, याशिवाय लॅायड्स मेटल्सचे अधिकारीगण सी.कुमरेसन, एस.व्यंकटेश्वरन, साई कुमार, बलराम सोमनानी, संजय चांगलानी आदी होते. त्यांच्या उपस्थितीत स्पर्धेतील विजेत्यांना शिल्ड, मेडल्स देवून गौरविण्यात आले.
याप्रसंगी लॉयड्स मेटल्स अँड एनर्जी लिमिटेड कंपनीमध्ये 27 वर्ष सेवा देणारे के.सत्याराव यांनी निवृत्ती घेत असल्याचे घोषित केल्याने त्यांचा शॉल व श्रीफळ देवून भावपूर्ण सत्कार करण्यात आला.
“युवक-युवतींना उत्तम प्लॅटफार्म देणार- प्रभाकरन”
बक्षीस वितरण कार्यक्रमप्रसंगी आपले मनोगत व्यक्त करताना बी.प्रभाकरन यांनी मॅरेथॉन स्पर्धेत कंपनीच्या सर्व महिला–पुरुष कर्मचाऱ्यांनी सहभाग घेतल्याने मला खूप आनंद झाला. ही माझ्यासाठी गौरवाची बाब आहे. यापुढेही स्थानिक समुदायात सकारात्मकता, जोश, उत्साह आणण्याकरिता नेहमी अशा स्पर्धांचे आयोजन करून या भागातील युवक-युवतींकरीता एक उत्तम प्लॅटफॉर्म उपलब्ध करून देण्याचा आपला मानस असल्याचे त्यांनी सांगितले. पण त्याकरीता फक्त आपली तयारी पाहिजे, आपण सगळे मिळून सोबत काम करत राहू. मला आपल्या लोकांचा साथ पाहिजे, असे आवाहन त्यांनी केले. कार्यक्रमाचे सूत्रसंचालन सौरव वालिया यांनी तर आभार प्रदर्शन जानवी शेंडे यांनी केले.
