नितीन शिंदे, मुंबई महानगर प्रतीनिधी
महाराष्ट्र संदेश न्युज ! ऑनलाईन मुंबई:- आमदार प्रताप सरनाईक यांनी एमएमआरडीए चे आयुक्त श्रीनिवासन यांची भेट घेऊन गायमुख कासारवडवली ते वडाळा मेट्रो-४ या मेट्रोच्या कामासंदर्भात तसेच वाघबीळ, ओवळा या गावातील मेट्रो स्टेशनच्या नावासंदर्भात चर्चा करण्यात आली.
काही दिवसांपूर्वी वाघबीळ गाव व ओवळा गाव तसेच आजूबाजूच्या परिसरातील ग्रामस्थांनी आमदार प्रताप सरनाईक यांची भेट घेऊन विजय गार्डन मेट्रो स्टेशन नावाऐवजी वाघबीळ गाव मेट्रो स्टेशन व ओवळा येथील गोवन पाडा या मेट्रो स्टेशनचे नाव ओवळा मेट्रो स्टेशन करणेसंदर्भात भेट घेतली होती. त्यावेळी ग्रामस्थांनी आपल्या तीव्र भावना व्यक्त करून ज्या भुमिपुत्रांनी आपल्याला जमिनी कुठलाही मोबदला न घेता अथवा कवडीमोल भावाने शासनाला विकास कामासाठी दिल्यानंतर जर त्यांच्या वाघबीळ व ओवळा गावाचे गावपण ही टिकणार नसेल तर आम्हाला आंदोलन करावे लागेल, अशी भुमिका घेतली असता आमदार प्रताप सरनाईक यांनी भुमिपुत्रांच्या रास्त मागणीचा विचार करून सदरहू दोन्ही नावे बदलण्यासंदर्भात दि. १७ फेब्रुवारी, २०२३ रोजी एमएमआरडीए च्या आयुक्तांना पत्र दिले होते.
त्याअनुषंगाने आज रोजी एमएमआरडीए च्या कार्यालयात आयुक्त श्रीनिवासन व आमदार प्रताप सरनाईक यांच्या झालेल्या बैठकीमध्ये विजय गार्डन ऐवजी वाघबीळ मेट्रो स्टेशन तसेच गोवन पाडा ऐवजी ओवळा मेट्रो स्टेशन असे नामकरण करण्यास एमएमआरडीए चे आयुक्त श्रीनिवासन यांनी मान्यता दिली असल्याने ग्रामस्थामध्ये आनंदाचे वातावरण आहे. शिवसेना ही नेहमीच बाळासाहेबांच्या विचाराने चालणारी संघटना असून मुख्यमंत्री एकनाथ शिंदे यांच्या मार्गदर्शना नुसार भुमिपुत्रांच्या व स्थानिकांच्या पाठीमागे ठामपणे उभे राहिल्याचे चित्र आज या कृतीतून सिध्द झाले असल्याचे आमदार प्रताप सरनाईक यांनी सांगितले. त्याबद्दल आ. प्रताप सरनाईक यांनी मुख्यमंत्री एकनाथ शिंदे व एमएमआरडीए चे आयुक्त श्रीनिवासन यांचे ग्रामस्थांच्या वतीने आभार मानले.
