वैशाली गायकवाड उपसंपादक (पुणे)
महाराष्ट्र संदेश न्युज ! ऑनलाईन पुणे:- येथून एक खळबजनक घटना समोर आली आहे. उच्चभ्रू पुण्यातील कोथरूड परिसरात एका नव विवाहित महिलेचा हुंड्यासाठी अमानुष छळ करण्यात आला असून, या विवाहित महिलेला मिरची पावडर पाण्यात मिसळून ते तिखट पाणी तिच्या तोंडात, डोळ्यात, कानात ओतल्याचा प्रकार घडला आहे. ते इतक्यावरच हा छळ थांबला नाही तर, तिला जळत्या लाकडाने हातावर, पायावर व ओठावर चटकेही देण्यात आल्याचे 22 वर्षीय विवाहित तरूणीने कोथरूड पोलीस ठाण्यात दाखल केलेल्या तक्रारीत म्हटले आहे. विवाहितेच्या छळ प्रकरणी पती नागेश कार्तीक साहेबन्ने वय 23 वर्ष, रत्ना कार्तीक साहेबन्ने वय 42 वर्ष, महादेवी जाधव 58 वर्ष, सर्व रा. कोथरूड व लिंबराज भिसे वय 58 वर्ष रा. केळेवाडी, कोथरूड यांच्यावर गुन्हा दाखल करण्यात आला आहे.
पोलिसांनी दिलेल्या माहितनुसार, छळ करण्यात आलेल्या पीडित महिलेबरोबर नागेश साहेबन्ने यांच्या विवाह ऑक्टोबर 2021 मध्ये झाला होता. विवाहाच्या काही दिवसांत सासरच्यांनी तिला माहेरहून हुंड्याचे पैसे आणण्यासाठी तगादा लावला. यातून शिवीगाळ करून तिला त्रास देण्यास सुरूवात झाली. तिचा मानसिक व शारीरिक छळ केला. तर, हिंसाचाराची सीमा पार करत तिचे हातपाय बांधून पाण्यामध्ये मिरची पावडर मिसळून ते पाणी तिच्या तोंडात, कानात, डोळ्यात ओतले. तिच्या अंगावर तोंडावर मिठाचे पाणी टाकले, चुलीतील पेटलेल्या लाकडाने तिच्या हातावर, पायावर, डोळ्याजवळ, ओठावर चटके दिले. दरम्यान, अत्याचार सहन न झाल्याने तिने सरते शेवटी पोलिसांशी संपर्क साधला. पुढील तपास पोलीस करत आहेत.
सासूद्वारा मारहाणीचा प्रकार..
विवाहित सुनेला सासूकडून मारहाण होत असल्याने पीडित विवाहितेने पोलीस नियंत्रण कक्षाला फोन केला. ही माहिती मिळताच कोथरूड पोलिसांचे मार्शल तात्काळ घटनास्थळी दाखल झाले. त्यांनी महिलेला ससून रूग्णालयात उपचारासाठी दाखल केले. त्यानंतर विवाहित तरुणीने दिलेल्या तक्रारीनुसार पोलिसांनी विविध कलमा अन्वये गुन्हा दाखल केला असून, पोलिसांनी तपास सुरू आहे.
