वैशाली गायकवाड, उपसंपादक (पुणे)
महाराष्ट्र संदेश न्युज ! ऑनलाईन पुणे:- जिल्हातील दौंड तालुक्यातील केडगाव येथून एक खळबजनक घटना समोर आली आहे. येथील एका परीक्षा केंद्रात बारावी बोर्डाचे परीक्षा सुरू असताना विद्यार्थी सामूहिकरित्या कॉपी करत असताना आढळून आले. या विद्यार्थ्यांना कॉपी करण्यास मदत केल्याप्रकरणी परीक्षा केंद्र संचालकांसह 9 शिक्षकांवर यवत पोलीस स्टेशन मध्ये गुन्हा दाखल करण्यात आला आहे. त्यामुळे शिक्षण क्षेत्रात एकच खळबळ उडाली आहे.
सध्या संपूर्ण राज्यात विद्यार्थ्यांसाठी सर्वात महत्वपूर्ण असलेली दहावी व बारावीची परीक्षा सुरू आहे ही परीक्षा कॉपीमुक्त व्हावी म्हणून शासन स्तरावर मोठी काळजी घेण्यात येत आहे. पण कुठे कुठे कॉपी मुक्त अभियानाला गालबोट लावण्याच्या घटना समोर येत आहे. अशीच घटना केडगाव येथील जवाहर विद्यालय असणाऱ्या परीक्षा केंद्रातून समोर आली आहे.
पुणे जिल्हा परिषदेच्या भरारी पथकाने केडगाव येथील जवाहर विद्यालय व उच्च माध्यमिक विद्यालय परीक्षा केंद्रात भेट दिली असता सदर प्रकार उघडकीस आला. भरारी पथकाचे प्रमुख व विस्तार अधिकारी किसन भुजबळ यांनी याबाबतची फिर्याद पोलीस ठाण्यात दिली आहे.
सोमवार दिनांक 27 रोजी पुणे जिल्हा परिषदेच्या भरारी पथकाने दुपारी 12 वाजताच्या सुमारास केडगाव येथील जवाहर विद्यालय व उच्च माध्यमिक विद्यालयातील बारावीची परीक्षा केंद्र क्रमांक 193 येथे अचानक भेट दिली. तेव्हा परीक्षा काॅपीमुक्त न करता, विद्यार्थ्यांना सामूहिक काॅपी करण्यासाठी प्रतिबंध न करता, त्यांची अंगझडती न घेता, त्यांना काॅपी करण्यासाठी उत्तेजन देऊन अप्रत्यक्ष सहाय्य केले. याप्रकरणी यवत पोलीस स्टेशन येथे महाराष्ट्र प्रेवेंशन ऑफ मॅन प्रॅक्टिसेस अँड युनिव्हर्सिटी बोर्ड, एक्झामिनेशन ऍक्ट 1982 कलम 8 अंतर्गत गुन्हा दाखल करण्यात आलेला आहे. सदर गुन्हा हा परीक्षा केंद्र संचालक उपसंचालक व इतर शिक्षक असे एकूण नऊ जणांवर दाखल करण्यात आलेला आहे.
आरोपी परीक्षा केंद्र संचालक जालींदर नारायण काटे, उपकेंद्र संचालक रावसाहेब शामराव भामरे, शिक्षक प्रकाश कुचेकर, विकास दिवेकर, शाम गोरगल, कविता काशीद, जयश्री गवळी, सुरेखा होन, अभय सोडनवर यांच्या विरोधात गुन्हा दाखल करण्यात आला आहे. पुढील तपास यवत पोलीस करत आहे.
★★★★★★★★★★★★★★★★★★★
आपल्या परिसरातील बातम्या व घडामोडी बघण्याकरीता आजच महाराष्ट्र संदेश न्यूजच्या वेबसाईट www.maharashtrasandesh.com ला भेट द्या. 9766445348/7385445348
