संदिप सुरडकर नागपुर जिल्हा प्रतिनिधी
महाराष्ट्र संदेश न्युज ! ऑनलाईन नागपूर, दि. 5 जून:- जागतिक पर्यावरण दिनाच्या शुभ मुहूर्तावर विदर्भ युथ ऑर्गनायझेशनच्या विदर्भ अर्थ वॉरियर्स टीमतर्फे देशी रोप वाटपाचा कार्यक्रम सोमवार, दिनांक ५ जून २०२३ रोजी आयोजित करण्यात आला. राष्ट्रसंत तुकडोजी महाराज नागपूर विद्यापीठाचे आंतर विद्याशाखीय अभ्यास विद्याशाखा अधिष्ठाता तथा विदर्भ युथ ऑर्गनायझेशन अध्यक्ष डॉ. प्रशांत कडू यांनी या कार्यक्रमाचे नेतृत्व केले. नागपुरात सकाळी ६.३० वाजता अंबाझरी गार्डन गेटसमोर हा कार्यक्रम पार पडला. वारसा वृक्ष वाचवण्याच्या कल्पनेला चालना देणे हा या कार्यक्रमाचा मुख्य हेतू होता. हा कार्यक्रम संपूर्ण विदर्भात ११ जिल्ह्यांमध्ये आयोजित करण्यात आला. एकाच वेळी एकूण १५५१ रोपांची लागवड करण्यात आली. वारसा झाडे वाचवा या संकल्पनेवर एक वर्षाचा कार्यक्रम खालीलप्रमाणे आहे.
या कार्यक्रमात ज्या रोपटे धारकांनी हमीपत्र भरले आहे. त्यांनी एका वर्षासाठी झाडांचे संगोपन करावे. वर्षातील प्रत्येक ५२ आठवडे त्या रोपट्याचे चित्र क्लिक करावे. त्यांना अर्थ वॉरियर्स असे संबोधले जाते. एक वर्षानंतर, त्याच तारखेला ५ जून २०२४ रोजी, रोपेधारक सदस्य वाढलेली रोपे कार्यक्रमात आणतील आणि त्यानंतर ते रोपे योग्य ठिकाणी लावली जातील. काही रोपे अंबाझरी बागेत योग्य ठिकाणी लावण्यात आली. काही रोपांचे कार्यक्रमातील सहभागींना वाटप करण्यात आले.
या कार्यक्रमाचे प्रमुख पाहुणे गव्हर्नमेंट आयटीआय कॉलेज प्राचार्य हेमंत आवरे होते. या कार्यक्रमाचे संयोजक हिमांशू महाजन व अपूर्वा पित्तलवार होते. एकूणच या कार्यक्रमाला मोठे यश मिळाले. आणि कार्यक्रमाला मोठ्या संख्येने तरुण उपस्थित असल्याने वारसा झाडे वाचवा हा संदेश खऱ्या अर्थाने लोकांपर्यंत पोहोचला आहे. तिथे उपस्थित असलेल्या प्रत्येक तरुणाने मिशन ग्रीन नेशनचा संदेश प्रत्येक जिल्ह्यात पसरवण्याची शपथ घेतली.
