स्नेहल ससाणे पुणे शहर प्रतिनिधी
महाराष्ट्र संदेश न्युज ! ऑनलाईन पुणे:- मागील काही काळापासून लहान मुलांवर अत्याचाराचे प्रमाण मोठ्या प्रमाणात वाढत असल्याचे दिसून येत आहे. शाळेतील शिक्षकांद्वारे पण लैंगिक शोषण करण्यात येत असल्याच्या संतापजनक घटना पण घडत असल्याने आज मुल खरच सुरक्षित आहे काय हा प्रश्न पालकांना पडला आहे. अशीच एक संतापजनक घटना शिक्षणाचे माहेरघर असलेल्या पुण्यातून समोर आली आहे.
पुणे शहरातील एका शाळेत 3 वर्षीय विद्यार्थीनीसोबत महिला शिक्षिकेने अश्लिल कृत्य केल्याचा प्रकार घडला. घटनेने परिसरात खळबळ उडाली असून शिक्षिकेविरोधात गुन्हा दाखल करण्यात आला आहे. तक्रारदार पालकाची 3 वर्षाची मुलगी कोथरूड परिसरातील एका शाळेत शिक्षण घेते. मुलीने शाळेतून घरी आल्यानंतर शिक्षिकेविरोधात आपल्या वडिलांकडे तक्रार केली. ज्यामध्ये तिने ‘अंजना टीचर शाळेत केस ओढतात, गालगुच्ची घेतात, हात कापू का, तुला मेणबत्तीचे चटके देईन, आणि घरच्यांना सांगायचे नाही’, असे म्हणत असल्याचे सांगितले. मुलीच्या तक्रारीनंतर पालकांनाही धक्का बसला. त्यांनी तात्काळ पोलीस स्टेशन गाठत संबंधित महिला शिक्षिकेविरोधात तक्रार दाखल केली. या तक्रारीनुसार, कोथरूड पोलीस ठाण्यात 40 वर्षीय शिक्षिके विरोधात भादंवि 323, 506, ज्यूवेनाईल जस्टीस ऍक्टनुसार गुन्हा दाखल करण्यात आला आहे. पोलिस याबाबतचा पुढील तपास करत आहेत.
