सागर शिंदे, वाशिम जिल्हा प्रतिनिधी
महाराष्ट्र संदेश न्युज ! ऑनलाईन वाशिम :- श्री राम जन्मभूमी तीर्थक्षेत्र अयोध्या येथून आलेल्या अक्षतांची मालेगाव मधील प्रभाग क्रमांक 17 मधून भव्य शोभायात्रा काढण्यात आली. यावेळी शेकडो महिला पुरुषांच्या व लहान बालकांच्या उपस्थितीने संपूर्ण परिसर रांगोळ्या भगव्या पताका तसेच पुष्पवृष्टीने श्री राममय झाला होता.
अयोध्या येथे २२ जानेवारी २०२४ ला प्रभू श्रीराम भव्य मंदिरात विराजमान होणार आहेत. श्रीरामाचे मंदिरात विराजमान होणारे निमंत्रण देण्यासाठी घरोघरी अयोध्येतून आलेल्या अक्षता वितरण होणार असून या अनुषंगाने अक्षतांच्या भव्य कलश यात्रेचे आयोजन करण्यात आले होते.
गजानन महाराज मंदिर शिक्षक कॉलनी येथून प्रारंभ झालेली कलश यात्रा अकोला मुख्य मार्गाने, अंकल नगर, मुंगसाजी नगर, गाडगेबाबा नगर तसेच ना.ना. मुंदडा शाळेच्या मागील बाजूने येत शिक्षक कॉलनी येथील गजानन महाराज मंदिर येथे समारोप झाला. याप्रसंगी प्रभाग क्रमांक १७ मध्ये अक्षता कलशाचे भव्य स्वागत घरासमोर रांगोळी व आतिषबाजी करत करण्यात आले तसेच ज्या मार्गाने कलश यात्रा निघाली त्या सर्वच मार्गांमध्ये ठिकठिकाणी अक्षता कलशांचे पूजन करण्यात आले.