रवींद्र भदर्गे जालना जिल्हा प्रतिनिधी
महाराष्ट्र संदेश न्युज ! ऑनलाईन जालना:- जिल्हातील जाफराबाद तालुक्यातून एक धक्कादायक घटना समोर आली आहे. जाफराबाद तालुक्यातील आरदखेडा गावात एका जन्मदात्या आईनेच आपल्या पोटच्या 5 वर्षीच्या मुलाला झोपेत गळफास देऊन हत्या केली त्यानंतर स्वत: ही घरातच पत्राच्या लोखंडी अँगलला गळफास लावून आत्महत्या केल्याच्या घटनेने संपूर्ण तालुका हादरला आहे. गंगासागर महादू उगले वय 28 वर्ष व अंश महादू उगले वय 5 वर्ष अशी मृतांची नावे आहेत.
प्राप्त माहितीनुसार, आरदखेडा येथील दिलीप उगले यांचा मुलगा महादू उगले यांचा विवाह वर्ष 2013 मध्ये भोकरदन तालुक्यातील सिपोरा बाजार येथील महादू कुदर यांची कन्या गंगासागर यांच्याशी झाला होता. महादु उगले छत्रपती संभाजीनगर येथे एका कंपनीमध्ये नोकरीला असल्याने दोघे पती-पत्नी संभाजीनगरला राहत होते. संसार सुरळीतपणे सुरू असतानाच गंगासागर उगले यांना मानसिक आजार जडल्याने तिच्यावर छत्रपती संभाजीनगर येथील एका खासगी रुग्णालयात उपचार सुरू होते. परंतु प्रकृतीत कुठलीच सुधारणा होत नसल्याने दोन महिन्यांपूर्वी पती महादू उगले यांनी मुलगा अंश व पत्नी गंगासागर यांना आरदखेडा येथे आईवडिलांकडे आणून सोडले होते. गावाकडे असताना गंगासार हिच्यावर खासगांव, विदर्भातील सैलानी येथे उपचार करण्यात आले. परंतु याचा कुठलाच उपयोग झाला नाही.
या घटनेच्या दिवशी गंगासागर, मुलगा अंश तसेच सासू-सासरे घराबाहेर अंगणात झोपलेले होते. तेव्हा गंगासागर हिने घरातील पत्राच्या लोखंडी अँगलला दोरीच्या सहाय्याने मुलगा अंशला गळफास दिला. त्यानंतर स्वत:ही गळफास घेत आपली जीवनयात्रा संपवली. दरम्यान, सकाळी हा प्रकार लक्षात आला.
या घटनेची माहिती जाफ्राबाद पोलिसाना देण्यात आली. त्यानंतर पोलिसांनी घटनास्थळी येऊन पंचनामा केला. त्यानंतर दोघांचे मृतदेह उत्तरीय तपासणीकरिता जाफ्राबाद ग्रामीण रुग्णालयात पाठविण्यात आले. शवविच्छेदन झाल्यानंतर मृतदेह नातेवाईकांच्या स्वाधीन करण्यात आले. या प्रकरणी गजानन उगले यांच्या फिर्यादीवरून जाफ्राबाद पोलीस ठाण्यात गुन्हा नोंद करण्यात आला आहे. पोलीस निरीक्षक प्रतापराव इंगळे यांच्या मार्गदर्शनाखाली उपनिरीक्षक सखाहारी तायडे अधिक तपास करत आहेत.
