राज शिर्के मुंबई महानगर प्रतिनिधी
महाराष्ट्र संदेश न्युज ! ऑनलाईन मुंबई:- नकली नोटा तयार करणारी टोळी जेरबंद केल्याने एकच खळबळ माजली आहे. वाडा तालुक्यातील निहालपाडा येथील एका शेतामध्ये नीरज वेखंडे या तरुणाच्या सहाय्याने भायखळा, मुंब्रा येथील तरुणांनी भारतीय चलनाच्या बनावट नोटा बनवण्याचा कारखाना सुरू केला होता. मागील 7 महिन्यांपासून लाखो रुपयांच्या बनावट नोटा बनविणारा हा कारखाना भायखळ्याच्या गुन्हे प्रकटीकरण पथकातील पोलिसांनी शनिवारी उद्ध्वस्त केला. याप्रकरणी चार आरोपींविरोधात गुन्हा दाखल करण्यात आला आहे.
निवडणूक काळात या कारखान्यात तयार केलेल्या बनावट नोटांचे मोठ्या प्रमाणात वितरण केल्याची प्राथमिक माहिती तपासात समोर आली आहे. नोटा बनविणाऱ्या टोळीचा पर्दाफाश करताना पोलिसांनी चौघांना अटक केली. टोळीचा मुख्य सूत्रधार फरार आहे. उमरान उर्फ असिफ बलवले वय 48 वर्ष रा. मुंब्रा, यासीन युनूस शेख वय 42 वर्ष, भीम बडेला वय 45 वर्ष दोन्ही रा. भायखळा आणि स्थानिक नीरज वेखंडे अशी बेड्या ठोकण्यात आलेल्या आरोपींची नावे आहेत.
बनावट नोटांचा टोळीतील काही जण दुचाकी मोटर सायकल वरून भायखळा येथे बनावट नोटा वितरित करण्यासाठी येणार असल्याची माहिती भायखळा पोलिसांना मिळाली होती. त्या आधारे पोलिसांनी सापळा रचला होता. भायखळा येथे तीन व्यक्ती आल्यानंतर पोलिसांनी त्यांना ताब्यात घेऊन त्यांची अंगझडती घेतली असता त्यांच्या कडे 500 रुपयांच्या 200 रुपयाचा बनावट नोटा आढळून आल्या.
बनावटी नोटा प्रकरणी फरार मुख्य आरोपी एका गुन्ह्यात जामिनावर सुटला होता. तुरुंगातून बाहेर आल्यानंतर त्याने नीरजच्या मदतीने बनावट नोटा बनवण्याचे नियोजन केले. त्यासाठी वाडा तालुक्यातील निहालपाडा येथील एका शेतात पत्र्याचे शेड बांधले. तेथे फरार आरोपी आणि नीरज दिवसभर बनावट नोटा तयार करत होते. बनावट नोटा ओळखण्याचे मशीनही त्यांच्याकडे होते. मशीनवर नोटा तपासूनच त्या विक्रीसाठी पुढे देत असत.
