मुकेश चौधरी कार्यकारी संपादक
महाराष्ट्र संदेश न्युज ! ऑनलाईन हिंगणघाट:- येथील नारायण सेवा मित्र परिवाराच्या वतीने दिनांक १५ मे २०२५ रोजी धनश्री नेत्रालयाच्या प्रांगणात गुणवंत विद्यार्थ्यांचा सत्कार आणि गरजू रुग्णांना चष्मा वाटपाचा कार्यक्रम मोठ्या उत्साहात आणि यशस्वीपणे पार पडला. या कार्यक्रमाच्या अध्यक्षस्थानी पी.वी टेक्सटाईल जामचे संचालक आदर्श मोहता होते तर प्रमुख पाहुणे म्हणून डॉ. रमेश करवा, डॉ. संजय ओस्तवाल, उद्योगपती अशोक मिहाणी, पत्रकार संघाचे अध्यक्ष प्रा. किरण वैद्य, नारायण सेवा मित्र परिवाराचे अध्यक्ष महेश अग्रवाल यांची उपस्थिती होती.
यावेळी डॉ. संजय ओस्तवाल आणि डॉ. रमेश करवा यांनी आपल्या मार्गदर्शनातून विद्यार्थ्यांना प्रेरणा दिली आणि त्यांच्या पुढील शैक्षणिक वाटचालीस शुभेच्छा व्यक्त केल्या. अध्यक्षीय भाषणात आदर्श मोहता यांनी गुणवंत विद्यार्थ्यांचे अभिनंदन केले आणि त्यांच्या उज्ज्वल भविष्यासाठी शुभेच्छा व्यक्त केल्या.
या कार्यक्रमादरम्यान, इयत्ता १० वी (एसएससी) आणि इयत्ता १२ वी (एचएससी) च्या गुणवंत विद्यार्थ्यांचा मान्यवरांच्या हस्ते स्मृतिचिन्ह आणि पुष्पगुच्छ देऊन गौरव करण्यात आला. यामध्ये पियुष विनोद डंभारे, कु. जान्हवी गजानन ठाकरे, कु. राखी राजेश राठोड, कु. मनस्वी मोहन ठाकरे, निलेश विजय यादव, कु. सृष्टी प्रदिप डफळे, कु. योगेश्वरी डेकाटे आणि देवांश अजय भांडे या विद्यार्थ्यांचा समावेश होता. याव्यतिरिक्त, वैद्यकीय क्षेत्रातील उल्लेखनीय योगदानाबद्दल डॉ. आकाश रमेश करवा आणि यशस्वीरीत्या मोतीबिंदू शस्त्रक्रिया केल्याबद्दल डॉ. संजय ओस्तवाल यांचा विशेष सन्मान करण्यात आला. तसेच जेम्स सॅम्युअल, अजय कुमार यादव, प्रदीप जोशी, शेळके, भारत पाटील, वैशाली पोळ, सुनील फुटाणे या मुख्याध्यापकांचाही सत्कार मान्यवरांच्या हस्ते करण्यात आला.
या कार्यक्रमाच्या अंतिम टप्प्यात, नारायण सेवा मित्र परिवाराने आयोजित केलेल्या निःशुल्क नेत्र तपासणी शिबिरातील ५४ मोतीबिंदू शस्त्रक्रिया झालेल्या गरजू रुग्णांना मान्यवरांच्या हस्ते चष्म्यांचे वितरण करण्यात आले. या कार्यक्रमाचे प्रास्ताविक प्रा. किरण वैद्य यांनी केली, संचालन दुर्गाप्रसाद यादव तर आभार पराग मुडे यांनी मानले. या यशस्वी कार्यक्रमासाठी नारायण सेवा मित्र परिवाराचे सदस्य, शहरातील नागरिक, शिक्षक आणि विद्यार्थी मोठ्या संख्येने उपस्थित होते. कार्यक्रमाच्या यशस्वी आयोजनात सर्व पदाधिकारी आणि सदस्यांनी मोलाचे योगदान दिले.
