उषाताई कांबळे, सांगली शहर प्रतिनिधी
महाराष्ट्र संदेश न्युज ! ऑनलाईन महाराष्ट्र:- स्वयंदीप सोशल फाउंडेशन पुणे यांच्या वतीने सम्राट अशोक, महात्मा ज्योतिबा फुले, विश्वरत्न डॉ. बाबासाहेब आंबेडकर या महापुरुषांच्या जयंतीनिमित्त एक अभिनव उपक्रम राबविण्यात आला. जयंतीवर होणाऱ्या अवाढव्य खर्चाला फाटा देत पुणे, पिंपरी चिंचवड, फलटण, यवतमाळ या भागात विविध ठिकाणी विहार, सामाजिक भवन येथे विद्यार्थ्यांच्या परीक्षा घेण्यात आल्या. यावेळी लेखक, साहित्यिक, विचारवंत प्रा. डॉ. धनराज डहाट यांचे लिखित विश्वरत्न डॉ. बाबासाहेब आंबेडकर चरित्रमाला या पुस्तकाची निवड संस्थेने केली होती. 300 पुस्तकांचे वाटप जयंतीनिमित्त विद्यार्थ्यांना करण्यात आले होते.
यावेळी घेण्यात आलेल्या परीक्षेला विद्यार्थ्यांनी उत्स्फूर्त प्रतिसाद दिला. विद्यार्थ्यांनी महापुरुषांना वाचावे आणि त्यांच्या विचारांचे अनुसरण करावे हा त्यातील मुख्य उद्देश होता तो उपक्रम सफल झाला आहे. तसेच स्वयंदीप सोशल फाउंडेशन या संस्थेच्या वतीने शैक्षणिक, सामाजिक, महिला सक्षमीकरण व प्रबोधन असे विविध उपक्रम वर्षभर राबविले जातात.
वैचारिक जयंती साजरी करण्यात संस्थेच्या अध्यक्षा प्रतिभा वानखेडे, सदस्य सरिताताई सोनावणे, रागिणी कांबळे, सचिन कुरणे, वीणाताई कांबळे, विजय लोंढे, आशाताई बैसाने, पौर्णिमा भवरे, रिंकू मेश्राम, निलेश जोहरे यांनी परिश्रम घेतले.
