समाज माध्यमांवर सदैव प्रकाश झोतात असणाऱ्या मावळमधील प्रशांत उर्फ बाबाराजे गणपतराव देशमुख (33, रा. मु.पो. बेबडओव्हळ, ता. मावळ, जि. पुणे) याला शिरगाव पोलिसांनी अटक केली आहे बाबाराजे देशमुख याच्याविरूध्द 70 लाख रूपयांच्या खंडणीची मागणी करून 5 लाख खंडणी घेतल्याप्रकरणी गुन्हा दाखल करण्यात आला आहे.
याप्रकरणी वडगाव बुद्रुक येथील एका 48 वर्षीय सिव्हील इंजिनियरने शिरगाव पोलिस स्टेशनमध्ये फिर्याद दिली आहे. पोलिसांनी बाबाराजे देशमुख याच्याविरूध्द भादंवि कलम 406, 420, 386, 387 अन्वये गुन्हा दाखल केला आहे. सदरील गुन्हा सन 2013 ते नोव्हेंबर 2020 दरम्यान वेळावेळी मावळ तालुक्यातील बेबडओव्हळ येथील गट नंबर 196 घडला आहे.
याबाबत अधिक माहिती अशी की, बाबाराजे देशमुखची गट नंबर 196 मध्ये मौजे बेबड ओव्हळ (ता. मावळ)येथे असणारी 5 एकर मिळकत ही वनीकरण विभागात समाविष्ट आहे. त्या मिळकतीचे प्लॉटिंग होत नाही
याबाबत देशमुखला माहिती आहे. तरीदेखील त्याने त्या मिळकतीमधील 25 गुंठे जागेचा व्यवहार फिर्यादी सिव्हील इंजिनियरसोबत केला. त्याचा मोबदला म्हणून 25 लाख रूपये घेतले. त्या जागेचे फिर्यादीच्या नावाने खरेदीखत करून न देता व घेतलेले 25 लाख रूपये फिर्यादीला परत न करता त्यांची फसवणूक केली. 70 लाखाच्या खंडणीची मागणी केली. पैसे न दिल्यास अथवा पोलिसांकडे तक्रार केल्यास फिर्यादीस जीवे मारण्याची धमकी दिली आणि 5 लाख रूपये खंडणी म्हणून घेतले.शिरगाव पोलिस स्टेशनमध्ये गुन्हा दाखल झाल्यानंतर पोलिसांनी बाबाराजे देशमुख याला अटक केली आहे.गुन्हयाचा पुढील तपास पोलिस उपनिरीक्षक कांबळे करीत आहेत.
