सौ. हानिशा दुधे, बल्लारपूर तालुका प्रतिनिधी
महाराष्ट्र संदेश न्युज ! ऑनलाईन चंद्रपूर:- येथून एक खळबळजनक प्रकार समोर आला आहे. त्यामुळे संपूर्ण जिल्हा पोलिस प्रशासनात एकच खळबळ माजली आहे. एका मानसिक रुग्ण असलेल्या कैद्याला चंद्रपूर वैद्यकीय महाविद्यालयात उपचारांसाठी नेणाऱ्या पोलिस शिपायास कैद्याने झाडूने मारहाण केल्याची घटना समोर आली आहे. या मारहाणीचा व्हिडिओ सोशल माध्यमावर व्हायरल झाला असून, तो व्हिडिओ एक आठवड्या पूर्वीचा असल्याची चर्चा संपूर्ण चंद्रपुर शहरात रंगली आहे. तसेच तो पोलिस शिपाई मद्य प्राशन करून होता, अशी सूत्रांकडून माहिती प्राप्त झाली आहे.
चंद्रपूर येथील जिल्हा कारागृहात मागील अनेक महिन्यांपासून एक मानसिक रुग्ण असलेला कैदी आहे. त्याचे मानसिक संतुलन बिघडल्यानंतर तो विचित्र वागतो. या कैद्याची अचानक प्रकृती खालावल्याने त्याला उपचारासाठी पोलिस कर्मचाऱ्यांनी चंद्रपूर येथील वैद्यकीय महाविद्यालयात नेले. मात्र, ज्या पोलिस शिपायाने त्याला रुग्णालयात नेले तो पोलिस शिपाई स्वतः दारूच्या नशेत धुत होता. दरम्यान, कैद्याचे अचानक मानसिक संतुलन बिघडले. त्याने रुग्णालयामध्ये पडलेला झाडू उचलला आणि डॉक्टर, नर्स आणि कर्मचाऱ्यांसमोर पोलिस शिपायास मारहाण करण्यास सुरुवात केली. तेथील कर्मचाऱ्यांनी मध्यस्ती करून त्याला सोडवले. मारहाण सुरू असताना एकाने या घटनेचे मोबाईलमध्ये चित्रीकरण केले. आता हा व्हिडिओ समाज माध्यमावर व्हायरल झाला आहे.
