उषाताई कांबळे सांगली शहर प्रतिनीधी
महाराष्ट्र संदेश न्युज ! ऑनलाईन सांगली:- शहरातून एक खळबळजनक घटना समोर आली आहे आहे. येथे राष्ट्रवादी काँग्रेसच्या कार्यकर्त्यावर गोळ्या झाडून त्याची निर्घृण हत्या करण्यात आली आहे. नालसाब मुल्ला असे हत्या झालेल्या कार्यकर्त्याचे नाव आहे. त्याच्यावर एका पाठोपाठ आठ गोळ्या झाडण्यात आल्या आहे. त्यामुळे सांगली शहरात एकच खळबळ माजली आहे.
मृतक नालसाब मुल्ला हे राष्ट्रवादी काँग्रेसचे कार्यकर्ते आहे. यांच्यावर बुलेट मोटरसायकल वरून आलेल्या दोघा हल्लेखोरांनी मुल्ला यांच्यावर धारधार शस्त्रांनी वार करत एकाच वेळी आठ गोळ्या झाडल्या आहेत. हल्ला केल्यानंतर हल्लेखोर पसार झाले आहेत. काल दिनांक 17 जून रात्री साडे आठ वाजण्याच्या सुमारास घडलेल्या या घटनेमुळे परिसरामध्ये भीतीचे वातावरण निर्माण झाले आहे. या घटनेची माहिती मिळताच, सांगलीचे पोलीस अधीक्षक बसवराज तेली यांच्यासह पोलीस अधिकारी घटनास्थळी तातडीने दाखल झाले होते. या घटनेमुळं परिसरामध्ये तणावाचं वातावरण निर्माण झाला आहे. या ठिकाणी मोठा पोलीस बंदोबस्त तैनात करण्यात आला आहे.
नालसाब मुल्ला हे राष्ट्रवादीचे सक्रिय कार्यकर्ते आहेत. मात्र, मुल्ला यांची पार्श्वभूमी गुन्हेगारी स्वरूपाची राहिली आहे. त्यांच्या विरोधात गंभीर गुन्हे यापूर्वी दाखल होते. मात्र, गेल्या काही वर्षांपासून ते सामाजिक कार्यात सक्रिय झाले होते. शनिवारी रात्रीच्या सुमारास नालसाब मुल्ला हे आपल्या घराबाहेर बसले असता अज्ञात दोघा हल्लेखोरांनी येऊन मुल्ला यांना शिवीगाळ करत त्यांच्यावर एकामागून एक आठ राऊंड फायर केले. ज्यामध्ये नालसाब मुल्ला हे गंभीर जखमी झाले. त्यांना सांगलीच्या शासकीय रुग्णालयामध्ये उपचारासाठी दाखल करण्यात आले होते. मात्र, उपचारादरम्यान त्यांचा मृत्यू झाला आहे.
सध्या मुल्ला यांच्या घराबाहेर मोठा पोलीस बंदोबस्त तैनात करण्यात आला आहे. ही हत्या कोणत्या कारणामुळं करण्यात आली, हे आद्यप स्पष्ट झाले नाही. मात्र गोळीबाराच्या घटनेने सांगली शहरात दहशतीचे वातावरण निर्माण झाले आहे.
