संदिप सुरडकर नागपुर जिल्हा प्रतिनिधी
महाराष्ट्र संदेश न्युज ! ऑनलाईन नागपूर:- येथून एक भीषण अपघाताची घटना समोर आली आहे. शहरातील रामनगर भागातील सर्कलजवळ एका कारने मोटर सायकल स्वाराला धडक देऊन नंतर रस्त्याने पायी जात असलेल्या महिलेला चिरडल्याने यात दोघांचा दुर्दैवी मृत्यू झाला. हा भीषण अपघात रविवारी दिनांक 13 ऑगस्ट रोजी सकाळी 10.45 वाजताच्या सुमारास झाला. यात कुसुमाबाई ईश्वर भोयर वय 64 वर्ष, रा. संजय नगर पांढराबोडी आणि पावस राजेद्रकुमार चौरसिया वय 33 वर्ष, रा. श्रीराधे अपार्टमेंट, हिलटॉप अशी मृतकाची नावे आहेत.
घटनास्थळी उपस्थित असलेले मृतक युवकाचे वडिल राजेंद्रकुमार मातादीन चौरसिया वय 62 वर्ष यांनी या अपघाताबाबद पोलिसात तक्रार दिली. यांच्या तक्रारीवरून पोलिसांनी कारचालक याच्यावर गुन्हा दाखल केला असून चालकाचा शोध घेत आहेत.
पोलिसांनी दिलेल्या माहितीनुसार, खासगी व्यवसाय करणारे राजेंद्रकुमार चौरसिया हे आपल्या मुलासह रामनगर येथील राममंदिराच्या रस्त्यावरून मोटर सायकल MH 40 BH 3625 रवीनगरच्या दिशेने जात होते. त्याच्या बाजून पायी कुसुमाताई भोयर या नातेवाईकांसह जात पायी जात होत्या. मोपेडच्या मागून कार MH 31 CP 5322 भरधाव वेगाने आली. कारने प्रथम मोपेडला जोरदार धडक दिली. त्यामुळे राजेंद्रकुमार चौरसिया हे खाली पडले आणि त्यांचा मुलगा पावस हा दुचाकीसोबत काही दूर घासत गेला. दरम्यान बाजूला असलेल्या कुसुमाताई भोयर त्यांच्या धक्क्याने खाली पडल्या. त्यांच्या अंगावरून कार त्यांना चिरडून निघाली. यामुळे त्यांचा जागी मृत्यू झाला. पावस चौरसिया यामध्ये गंभीर जखमी झाल्याने त्यांना एका खासगी रुग्णालयात दाखल करण्यात आले. उपचार सुरू असताना सायंकाळी त्यांचाही मृत्यू झाला. पोलिसांना राजेंद्रकुमार मातादीन चौरसिया यांनी दिलेल्या तक्रारीवरून विनोद म्हात्रे यांनी गुन्हा दाखल केला. वाहन चालक अद्यापही फरार असून त्याचा शोध सुरू आहे.
आरोपी चालक मोठ्या वकिलाचा मुलगा…. रविनगर परिसरात आपल्या महागड्या कारने महिलेला चिरडत मोपेडला धडक देणारा २४ ते २५ वर्षीय युवक नागपुरातील एका मोठ्या वकिलाचा मुलगा असल्याची माहिती आहे. पोलिसांनी त्याचा शोध घेतला असता, तोही अपघातात जखमी झाला असून त्याचावर उपचार सुरू असल्याची माहिती सूत्रांनी दिली. सोमवारी त्याला पोलिस ताब्यात घेण्याची शक्यता आहे. दरम्यान अपघात इतका भीषण होता की, परिसरात महिलेच्या रक्ताचा सडा पडल्याचे दिसून आले.
