देशात लोकसभा निवडणुकीचे पडघम वाजू लागले आहेत. राज्यातही महायुती आणि मविआच्यावतीनं मोर्चेबांधणी सुरु आहे.
राज शिर्के, मुंबई शहर प्रतिनिधी
महाराष्ट्र संदेश न्युज ! ऑनलाईन मुंबई:- शिवसेना पक्ष पदाधिकाऱ्यांची बैठक आज व्हिसीद्वारे पार पडली. या बैठकीत राज्यभरातील पदाधिकारी ऑनलाइन जोडले गेले होते. या बैठकीला शिवसेनेचे मुख्य नेते एकनाथ शिंदेयांनी वर्षा बंगल्यावरून संबोधित केले. या बैठकीत राज्यातील महायुती सरकारने केलेली विकासकामे, योजना घराघरात पोहोचवून लोकसभेत ४८ जागांवर पूर्ण ताकदीनिशी लढण्याचा निर्धार व्यक्त केला. तसेच राज्यभरात शिवसेनेची ताकद दाखविण्यासाठी राज्यभरात शिवसंकल्प अभियान राबविण्याचे जाहीर केले. या अभियानाच्या माध्यमातून दोन टप्प्यात प्रचार मेळावे घेण्यात येणार आहेत.
शिवसंकल्प अभियानाचा पहिला टप्पा ६ जानेवारी रोजी यवतमाळ येथुन सुरू होणार असून ११ जानेवारी रोजी छत्रपती संभाजीनगर येथील सभेने पहिल्या टप्प्यातील प्रचार दौरा पूर्ण होणार आहे. दुसऱ्या टप्प्यात २५ जानेवारीपासून पुन्हा प्रचार मेळाव्याला सुरूवात होणार असून २५ जानेवारी रोजी शिर्डी येथे पहिला प्रचार मेळावा पार पडेल. या प्रचार मेळाव्यांचा समारोप ३० जानेवारी रोजी हातकणंगले येथे होईल
या प्रचार मेळाव्यांच्या समारोपासह पक्षाच्या वतीने कोल्हापूर येथे दोन दिवसीय विशेष महाशिबिराचे आयोजन करण्यात येणार आहे. त्यानंतर या शिवसंकल्प अभियानाची सांगता होणार असल्याचे या बैठकीत सांगितले.
२२ जानेवारी रोजी अयोध्येत प्रभू श्रीरामाचा प्राणप्रतिष्ठा सोहळा संपन्न होत आहे. हा क्षण कायम लक्षात रहावा. यासाठी घराबाहेर भगवा झेंडा लावावा, गुढ्या उभाराव्यात, जागोजागी दीपोत्सव साजरा करण्याचे आवाहन यावेळी शिवसेनेच्या सर्व मंत्री, नेते, आमदार, खासदार आणि पदाधिकाऱ्यांना केले.यावेळी खासदार आणि शिवसेना नेते गजानन कीर्तिकर, मंत्री अब्दुल सत्तार, शिवसेना सचिव संजय मोरे, शिवसेना सचिव संजय म्हशीलकर, शिवसेना उपनेते शिशिर शिंदे, शिवसेना आमदार भरतशेठ गोगावले, आमदार संजय शिरसाठ, शिवसेना प्रवक्ते राहुल लोंढे तसेच इतर सर्व मंत्री, नेते, उपनेते, खासदार, आमदार, पदाधिकारी व्हीसी द्वारे उपस्थित होते.
दरम्यान, आगामी लोकसभेसाठी राज्यात महाविकास आघाडी आणि महायुती यांच्यात लढत होणार आहे. यामध्ये महायुतीला कुणाचा कौल मिळणार याकडे सर्वांचं लक्ष लागलंय.
