नांदेड जिल्हा प्रतिनिधी
महाराष्ट्र संदेश देत ! ऑनलाईन नांदेड:- जिल्हातून एक संपूर्ण राज्याला हादरवणारी संतापजनक घटना समोर आली आहे. येथे एका 6 वर्षाच्या चिमुकलीवर अत्याचार करून तिची निर्घृण हत्या केल्याची घटना घडली आहे.
नांदेड जिल्ह्यातील मुदखेड तालुक्यातील रोहिपिंपळगाव या गावात पहिल्या वर्गात शिकणारी एक 6 वर्षीय चिमुकली आपल्या घराशेजारी असलेल्या शाळेसमोरील मैदानात खेळत होती. दुपारी 3.30 वाजेपर्यंत ही मुलगी मैदानातच खेळत होती मात्र, खेळता- खेळताच ती अचानक गायब झाली.
संध्याकाळचे 6 वाजले तरी मुलगी परत न आल्याने अखेर तिच्या कुटुंबीयांनी पोलिस स्टेशन गाठत मुलगी हरवल्याची तक्रार पोलिसात दाखल केली. घटनेची गांभीर्य लक्षात घेऊन वरिष्ठ पोलीस अधिकाऱ्यांसह मुदखेड पोलीसांनी रात्रभर तिचा शोध घेतला पण ही चिमुकली सापडली नाही. त्यानंतर काल म्हणजेच दिनांक 15 जानेवारी रोजी सकाळी मुदखेड जवळच्या उमरी रोडवर मुख्य रस्त्याशेजारी झुडुपातच चिमुकलीचा मृतदेह आढळून आल्याने संपूर्ण गावात खळबळ माजली आहे.
चिमुकलीचा मृतदेह आढळून आल्याची माहिती तात्काळ पोलिसांना देण्यात आली. चिमुकलीचा मृतदेह जिथे आढळला ते ठिकाण तिच्या गावापासून 12 किलोमीटर दूर आहे. या चिमुकलीवर अत्याचार करून अज्ञात नराधमाने तिची हत्या केल्याचे शवच्छेदन अहवालात निष्पन्न झाले आहे. पोलीसांनी अत्याचार, हत्या आणि अन्य कलमान्वये अज्ञात नराधम आरोपीविरुद्ध गुन्हा दाखल केला आहे. या घटनेनंतर आरोपीच्या शोधासाठी वरिष्ठ पोलीस अधिकाऱ्यांसह पोलिसांची वेगवेगळी पथकं तैनात केली असून आरोपीचा कसून शोध घेतला जात आहे.
