प्रवीण जगताप वर्धा उपजिल्हा प्रतिनिधी
महाराष्ट्र संदेश न्युज ! ऑनलाईन वर्धा, दि. 13:- लवकरच राज्यात मान्सून दाखल होणार आहे. त्यामुळे शेतकरी पेरणीची तयारी करत आहे. पण काही बियाणे कंपन्या शेतकऱ्यांना बोगस बियाण्याच्या नावावर लूटल्याचे प्रकार याअगोदर पण झाले आहे. त्यामुळे अशा बोगस बियाण्या पासून शेतकऱ्यांना बचावसाठी बोगस बियाणे खरेदी करू नये असे आव्हान करण्यात आले आहे.
बाजारात किंवा इतर व्यक्तींद्वारे महाशक्ती आर. आर. एचटीबीटी किंवा बी. जी. -3 इत्यादी नावाने बियाणे जिल्ह्यामध्ये येण्याची शक्यता नाकारता येत नाही. त्यामुळे अशा नावाने कोणतेही अनधिकृत कंपनीचे किंवा इतर प्रतिनिधीद्वारे मिळणारे बियाणे पेरणीसाठी खरेदी करु नये, असे आवाहन करण्यात आले आहे.
असे बियाणे कोणत्याही प्रकारची चाचणी न होता बाजारात आलेले असते. त्यामुळे अशा बियाण्यां पासून शेतकऱ्यांचे नुकसान होते. अशा अनधिकृत खरेदी केलेल्या बियाण्यांचे कोणतेही बिल किंवा परवाना नसतो. त्यामुळे शेतकऱ्यांना अशा बोगस बियाण्यांमूळे नुकसान झाल्यास कोणतीही भरपाई शासनामार्फत देण्यात येत नाही.
बियाणे खरेदी करतांना घ्यावयाची काळजी
बियाणे खरेदी करतांना अधिकृत परवाना असणाऱ्या कृषि सेवा केंद्रातून बियाणे खरेदी करावे. बियाणे खरेदीची पावती, पिशवी, टॅग इत्यादी जपून ठेवावी. पॉकीटावर लॉट नंबर, अंतिम मुदत, उगवणशक्ती इत्यादी बाबी तपासून घ्याव्यात. बियाणे पॉकीट योग्य वजनाचे असल्याबाबत खात्री करावी. कोणीही शेतकऱ्यांना असे बोगस बियाणे विक्री करीत असल्यास कृषि विभागाशी संपर्क साधावा. किंवा 18002334000 या टोल फ्री क्रमांकावर किंवा 07152-250099 या दुरध्वनी क्रमांकावर तक्रार नोंदवावी, असे कृषि विकास अधिकारी संजय बमनोटे यांनी कळविले आहे.
