अनिल कडू विशेष प्रतिनिधी हिंगणघाट
महाराष्ट्र संदेश न्युज ! ऑनलाईन हिंगणघाट:- हिंगणघाट रेल्वे स्टेशन येथे एक्सप्रेस गाड्यांचा थांबा मिळावा या करिता वर्धा-बल्लारशाह यात्री संघा कडुन खासदार अमर काळे याना निवेदन देऊन मागणी केली आहे. खासदार झाल्यानंतर अमर काळे यांचे हिंगनघाट येथे प्रथम आगमन झाले. त्यांची भेट घेऊन अध्यक्ष राजेश अ. कोचर यांनी त्यांचे स्वागत केले व निवेदन देण्यात आले.
वर्धा-बल्लारशाह यात्री संघाकडुन खा. अमर काळे यांना हिंगणघाट रेल्वे स्टेशन गाड्यांचा थांबा संबंधित चर्चा करून सविस्तर माहिती दिली. वर्धा-बल्लारशाह यात्री संघ यांच्या नेतृत्वात गेल्या पाच वर्षापासून हिंगनघाट रेल्वे स्टेशनला एक्सप्रेस गाड्यांचा थांबा मिळावा म्हणून भरपूर आंदोलने, चर्चा, बैठकी झाल्या परंतु हिंगनघाट रेल्वे स्टेशनला थांबा मिळत नसुन फक्त आश्वासन मिळतं आहे. कोविडच्या आधी हिंगनघाट रेल्वे स्टेशनला एक्सप्रेस गाड्यांचा थांबा होता. परंतु कोविड परिस्थिती सामान्य झाल्यानंतरही गाड्याचा थांबा सुरू न झाल्यामुळे प्रवाशांना प्रचंड त्रास सहन करावा लागत आहे. यावेळी रेल्वे प्रशासनाने फक्त आश्वासने आणि सहानुभूती पत्र दिले परंतु गाड्यांचा थांबा सुरू केला नाही. त्यामुळे खासदारांनी मध्यस्थी करून लवकरच गाड्यांचा थांबा सुरू करावा अशी मागणी करण्यात आली.
यावेळी खासदार अमर काळे यांनी सांगितले लवकरच प्रलंबित रेल्वे गाड्यांचे थांबे पूर्ववत केले जातील व स्वतः रेल्वे मंत्र्यांसोबत व अधिकारी यांच्या सोबत चर्चा करून हा प्रश्न लवकर मार्गी लावणार असे वर्धा-बल्लारशा संघाला खा. अमर काळे यांनी सांगितले. अमृत भारत योजनेंतर्गत स्थानकावर सुरू असलेली विकासकामे जलद गतीने करण्याचे आश्वासन त्यांनी दिले.
या निवेदनात बल्लारशाह-मुंबई, बल्लारशाह-पुणे ट्रेन दररोज सुरू करावी, काजीपेट-पुणे ही एक्सप्रेस साप्ताहिक आहे तीला रोज सुरू करण्यात यावे, भुसावळ-वर्धा मेमो पॅसेंजर बल्लारशाह पर्यंत वाढवावी, नागपूर माजरी-आदिलाबाद पॅसेंजर सुरू करावी, अजनी-काजीपेट पॅसेंजर सुरू करावी आणि कोरबा, इंदौर, रायपूर, जोधपूर, हिसरा (बिकानेर), धनबाद-कोल्हापूर एक्सप्रेस या रेल्वे गाड्यांचा अप आणि डाऊन रेल्वे थांबा हिंगणघाट रेल्वे स्टेशन वर देण्यात यावा, हिंगणघाट रेल्वे स्थानकावर सर्व प्रकारच्या मुलभूत सुविधा उपलब्ध करून द्याव्यात अश्या विविध मागणीचे निवेदन देण्यात आले. यावेळी सचिव डि.के. गुरनुले, दिलीप बालपांडे, मो. शहजाद आदींची उपस्थिती होती.
