विश्वनाथ जांभूळकर आलापल्ली तालुका प्रतिनिधी
महाराष्ट्र संदेश न्युज ! ऑनलाईन जारावंडी:- जारावंडी परिसरातील महसूल प्रशासनाविरोधात आवाज उठवत काल सुमारे 200 महिलांनी महसूल कार्यालय, जारावंडी येथे भव्य मोर्चा काढला. तलाठी आपल्या मुख्यालयाला नियमितपणे हजर राहत नसल्याच्या मुद्द्यावरून महिलांनी प्रशासनाच्या निष्क्रियते विरोधात तीव्र संताप व्यक्त केला. त्यांनी महसूल अधिकाऱ्यांना निवेदन देत ही समस्या त्वरित सोडवण्याची मागणी केली आहे.
जारावंडी परिसरातील नागरिकांना, विशेषतः महिलांना, सरकारी कामकाजासाठी अनेक अडचणींना सामोरे जावे लागत आहे. तलाठी कार्यालयात वेळेवर उपलब्ध नसल्यामुळे शेतकऱ्यांच्या जमिनींच्या नोंदी, सातबारा उतारे, आणि अन्य महत्त्वाच्या कागदपत्रांसाठी नागरिकांना मोठ्या प्रमाणात त्रास सहन करावा लागतो. यामुळे प्रशासना विरोधात महिलांमध्ये प्रचंड रोष निर्माण झाला आहे.
मोर्चा दरम्यान महिलांनी एटापल्लीचे तहसीलदार हेमंत गांगुर्डे यांना फोनवर विचारणा केली की, तलाठी नियमित उपस्थित का राहत नाही? यावर तहसीलदारांनी उत्तर दिले की, तालुक्यात तलाठ्यांची अनेक पदे रिक्त असल्याने काही तलाठ्यांना दोन साज्यांचा भार देण्यात आला आहे, त्यामुळे कामात दिरंगाई होत आहे. त्यांनी असेही सांगितले की, येथील कोतवाल कालिदास गेडाम हे आपले काम करून देतील.
मात्र, महिलांनी यावर आक्षेप घेतला आहे “जर कोतवाल तलाठ्यांचे काम करत असतील, तर नागरिकांचे प्रश्न खरोखर सुटणार का? परिसरात होत असलेल्या अवैध वाळू उपसा, खोदकाम आदी अवैध कामांवर कोण नियंत्रण ठेवणार?”
महिलांनी “तलाठी हजर नाही, कामे कशी पूर्ण होणार?” असा सवाल उपस्थित करत प्रशासनावर कडक टीका केली. त्यांनी स्पष्ट शब्दांत सांगितले की, जर ही समस्या लवकरच सोडवली गेली नाही, तर आणखी तीव्र आंदोलन छेडण्यात येईल अशा गंभीर ईशारा यावेळी देण्यात आला. या आंदोलनात अनेक ग्रामस्थ महिलांसह सामाजिक कार्यकर्ते आणि स्थानिक नेते सहभागी झाले होते. त्यांनी महसूल विभागाला स्थानिक प्रशासनाच्या पारदर्शकतेबाबत जबाबदारी घेण्यास भाग पाडले.
