महाराष्ट्र संदेश न्युज ! ऑनलाईन छत्तीसगड:- दिवशेनदिवस पत्रकारावर हल्ले हत्या झाल्याचे दिसून येत आहे. त्यात बिजापूर जिल्ह्यात एका पत्रकाराची हत्या करण्यात आल्याची खळबळजनक माहिती समोर आली आहे. हे पत्रकार मागील 3 दिवसांपासून बेपत्ता होते. एका कंत्राटदाराच्या आवारातील सेप्टिक टँकमधून पोलिसांनी या पत्रकाराचा मृतदेह बाहेर काढला.
खळबळजनक बाब म्हणजे हत्या करण्यात आलेल्या पत्रकाराने बस्तर मधील 120 कोटी रुपयांच्या रस्ते बांधकाम मोठा घोटाळा समोर आणला होता. हा घोटाळा समोर आल्यानतंर सरकारने कंत्राटदाराच्या कामाची चौकशी सुरू केली होती. त्यानंतर बेपत्ता झालेल्या पत्रकाराचा मृतदेह सापडला आहे.
प्राप्त माहितीनुसार, नववर्षाच्या पहिल्याच दिवशी म्हणजे 1 जानेवारी रात्रीपासून बेपत्ता असलेले 33 वर्षीय पत्रकार मुकेश चंद्राकर यांचा मृतदेह शुक्रवारी संध्याकाळी बिजापूर शहरातील चट्टणपारा भागातील एका कंत्राटदाराच्या आवारातील सेप्टिक टँकमधून मिळून आला. मुकेश चंद्राकर ‘बस्तर जंक्शन’ नावाने यूट्यूब चॅनल चालवत होते. याप्रकरणाची छत्तीसगडचे मुख्यमंत्री विष्णू देव यांनी गंभीर दखल घेतली असून गुन्हेगारांना कठोर शिक्षा दिली जाईल, असं त्यांनी म्हटलं आहे. Journalist Murdered in Chhattisgarh
पत्रकार मुकेश चंद्राकर यांचा मृतदेह ज्या जागेतून सापडला तो परिसर कंत्राटदार सुरेश चंद्राकर यांचा असल्याची माहिती पोलिसांनी दिली. कॉम्प्लेक्समध्ये बॅडमिंटन कोर्ट आणि नोकरांची घरे आहेत. बिजापूरचे रहिवासी पत्रकार मुकेश चंद्राकर हे 1 जानेवारीच्या रात्रीपासून घरातून बेपत्ता होते. यानंतर त्याचा मोठा भाऊ युकेश चंद्राकर याने पोलीस स्टेशन मध्ये तक्रार दाखल केली होती. मुकेश चंद्राकर बेपत्ता झाल्याची माहिती मिळताच पोलिसांनी त्यांचा शोध सुरू केला. सुरेश यांच्या मोबाईल क्रमांकाच्या लोकेशनच्या आधारे मुकेश चंद्राकर हा कंत्राटराच्या आवारात असल्याची माहिती पोलिसांना मिळाली. या प्रकरणी पोलिसांनी काही आरोपिना ताब्यात घेतले आहे.
शुक्रवारी सायंकाळी 7.00 वाजण्याच्या सुमारास पोलिसांनी सेप्टिक टँकमधून मुकेश यांचा मृतदेह बाहेर काढला. या युवा पत्रकाराच्या मृतदेहावर 10 ठिकाणी जखमा आढळल्या. यावरुन मृतदेह पाहून पत्रकाराची निर्घृण हत्या करण्यात आल्याचे स्पष्ट झाले आहे. डोक्याच्या मागच्या बाजूलाही जखमेच्या खुणा आढळल्या. हत्येनंतर मृतदेह सेप्टिक टँकमध्ये फेकून दिला होता. यानंतर कोणाला त्याचा सुगावा लागू नये म्हणून त्यावर प्लास्टरिंग करण्यात आले. काल दुपारी 4.30 वाजताच्या दरम्यान पोलिसांनी सेप्टिक टँकचे फ्लोअरिंग तोडले तेव्हा आतमध्ये मृतदेह सापडला.
