मधुकर गोंगले, उपसंपादक.
मो. नं. 9420751809.
एटापल्ली : भगवान शंकराच्या आराधनेचा आणि भक्तिभावाचा पवित्र उत्सव असलेल्या महाशिवरात्रीनिमित्त सोमवार, दिनांक १६ फेब्रुवारी २०२६ रोजी लॉयड्स मेटल्स अँड एनर्जी लिमिटेडतर्फे एटापल्ली व तूमरगुंडा येथे भव्य महाप्रसाद वाटप कार्यक्रमाचे आयोजन करण्यात आले. सामाजिक बांधिलकीची जाणीव जपत राबविण्यात आलेल्या या उपक्रमास भाविकांचा उत्स्फूर्त प्रतिसाद लाभला.
एटापल्ली येथील शिवाजी महाराज चौक, चेकिंग नाका तसेच तूमरगुंडा येथील महादेव मंदिर परिसरात महाप्रसादाचे नियोजनबद्ध पद्धतीने वितरण करण्यात आले. महाशिवरात्रीनिमित्त पहाटेपासूनच महादेवाच्या दर्शनासाठी भाविकांची मोठी गर्दी उसळली होती. उपवास, जप-तप आणि अभिषेक करून भक्तांनी भगवान शंकराची आराधना केली. त्यानंतर महाप्रसादाचा लाभ घेताना भाविकांच्या चेहऱ्यावर समाधान आणि आनंदाचे भाव स्पष्ट दिसत होते. संपूर्ण परिसर “हर हर महादेव”च्या जयघोषाने भक्तिमय वातावरणात न्हाऊन निघाला होता.
चेकिंग नाका एटापल्ली येथे महाप्रसाद वाटप कार्यक्रमाचा शुभारंभ पत्रकार संघटना एटापल्ली यांच्या हस्ते करण्यात आला. या प्रसंगी पत्रकार संघटनेचे अध्यक्ष रविंद्र रामगुंडेवार, सचिव तनुज बल्लेवार, तसेच जनार्दन नल्लावार उपस्थित होते. याशिवाय कंपनीचे प्रतिनिधी प्रसाद नामेवार, बंटी असुटकर, मिथुन जोशी, स्वप्निल आदी मान्यवरांनी उपस्थित राहून कार्यक्रमाचे नियोजन आणि अंमलबजावणी यामध्ये सक्रिय सहभाग नोंदविला.
महाप्रसाद वितरणाची संपूर्ण व्यवस्था शिस्तबद्ध आणि सुरळीत पार पडली. महिला, ज्येष्ठ नागरिक व लहान मुलांसाठी स्वतंत्र रांगेची सोय करण्यात आली होती. स्वयंसेवकांनी भाविकांना सन्मानपूर्वक प्रसाद देत सेवाभाव जपला. या उपक्रमामुळे कंपनी आणि स्थानिक नागरिक यांच्यातील सामाजिक नातेसंबंध अधिक दृढ होत असल्याचे मत अनेकांनी व्यक्त केले.
महाशिवरात्रीच्या पावन दिवशी भक्तसेवा आणि सामाजिक उत्तरदायित्व यांचा संगम घडवून आणणारा हा उपक्रम प्रेरणादायी ठरला आहे. धार्मिक उत्सवांच्या निमित्ताने समाजात ऐक्य, सद्भावना आणि सेवा भाव वाढीस लागावा, हा संदेश या कार्यक्रमातून अधोरेखित झाला. सर्व स्तरांतून या उपक्रमाचे कौतुक होत असून, भविष्यातही अशा सामाजिक कार्यक्रमांची अपेक्षा नागरिकांकडून व्यक्त करण्यात येत आहे.
