ब्रेकिंग न्यूज | एटापल्ली ॲक्टिव्हा दुचाकीने अचानक पेट घेतल्याने पुरुष ठार.

विश्वनाथ जांभुळकर एटापल्ली तालुका प्रतिनिधी क्र 9421856931
एटापल्ली : तालुक्यापासून अवघ्या तीन किलोमीटर अंतरावर असलेल्या एटापल्ली बारसेवाडा रोडवर शुक्रवारी एक धक्कादायक घटना घडली. लग्न जुळविण्याच्या कामासाठी जाऊन परत येत असताना ॲक्टिव्हा दुचाकीने अचानक पेट घेतल्याने एका इसमाचा जागीच मृत्यू झाला.
मिळालेल्या माहितीनुसार, ॲक्टिव्हा क्रमांक MH-33/AE-2739 या दुचाकीवरून परत येत असताना अचानक वाहनाला आग लागली. या भीषण घटनेत सिमन दसरू हिच्यामी (वय 42, रा. कृष्णार, ता. एटापल्ली) यांचा जागीच दुर्दैवी मृत्यू झाला.
घटनेची माहिती मिळताच एटापल्ली पोलिस पथक तात्काळ घटनास्थळी दाखल झाले. तसेच फॉरेन्सिक लॅबची टीमही घटनास्थळी पोहोचून तपास सुरू केला. पोलिसांनी पंचनामा करून पुढील तपास हाती घेतला आहे.
दरम्यान, मृतदेह एटापल्ली ग्रामीण रुग्णालयात शवविच्छेदनासाठी पाठविण्यात आला आहे. अचानक लागलेल्या आगीमागील नेमके कारण अद्याप स्पष्ट झाले नसून याबाबत पोलिसांकडून सखोल तपास सुरू आहे.
या दुर्दैवी घटनेमुळे परिसरात हळहळ व्यक्त करण्यात येत आहे.