✒️ विश्वास त्रिभुवन, अहमदनगर जिल्हा प्रतिनिधी
भोकर :- श्रीरामपूर तालुक्यात चोरट्यांचा धुमाकूळ सुरुच आहे. उक्कलगावात धुमाकूळ घालून दोन दिवस उलटत नाहीत, तोच भोकर शिवारातील श्रीरामपूर – नेवासा राज्य मार्गालगत अन्नपूर्णा मंगल कार्यालयाकडे चोरट्यांनी मोर्चा वळवून रोकड व काही ऐवज लंपास करून, तीन दिवस झाले तरी तपास नसल्याने संताप व्यक्त होत आहे. भोकर शिवारात उभ्या असलेल्या डीजेच्या गाडीतून तीन अॅम्प्लिफायर व एक मिक्सर असा ऐवज चोरट्यांनी रखवालदारास दमदाटी देवून चोरून नेला.
दरम्यान, ही घटना घडल्याचे समजताच डीजे गाडीचे मालक कोकाटे यांनी पहाटेच चोरट्यांचा पाठलाग केला. मात्र, पाटाच्या कडेला अडवून त्यांच्याकडून साडेबावीस हजारांची रोकड, मोबाईल हिसकावून घेवून त्यांना मारहाण करून, चोरट्यांनी पोबारा केला. याप्रकरणी तालुका पोलिसात मंगल कार्यालयातील चोरीचा गुन्हा दाखल केला आहे. मात्र, गाडी मालकास मारहाण व लूटल्याची फिर्याद घेण्यास पोलिसांनी नकार दिला आहे. भोकर शिवारात श्रीरामपूर- नेवासा राज्य मार्गालगत निपाणी वाडगाव येथील कोकाटे यांची डीजेची गाडी मंगल कार्यालय हॉलमध्ये लावलेली असताना पहाटेच्या सुमारास चोरट्यांनी येथे चोरी केली.