आकाश पांचाळ – पुणे जिल्हा प्रतनिधी
महाराष्ट्र संदेश न्युज ! ऑनलाईन पुणे:- जिल्हातील जुन्नर तालुक्यातून एक खळबळजनक घटना समोर आली आहे. येथील आळे गावात एका चार वर्षीय चिमुकल्यावर दबा धरून असलेल्या बिबटयाने हल्ला केला या हल्लात हा बालक गंभीर जखमी झाला आहे. ही घटना सोमवारी सायंकाळी 5 वाजताच्या सुमारास घडली.
प्राप्त माहितीनुसार जुन्नर तालुक्यातील आळे गावातील तितर मळ्यात रहात असलेले अमोल भुजबळ यांचा शिवांश हा चार वर्षीय मुलगा अंगणात आजोबा निवृत्ती भुजबळ यांच्या बरोबर खेळत असताना, अचानक घरासमोरील ऊसाच्या शेतातुन आलेल्या बिबट्याने या बालकावर हल्ला करत त्याच्या मानेला पकडुन नेत असताना, या ठिकाणी असलेल्या अविनाश गडगे या तरूणाने मोठी हिम्मत दाखवत बिबट्याच्या मागे पळत जाऊन त्या मुलाला बिबट्याच्या हल्ल्यातुन सोडवले.
परंतु या हल्ल्यात लहान बालक गंभीर जखमी झाला असुन, त्याच्यावर आळेफाटा येथील एका खाजगी दवाखान्यात उपचार दाखल करण्यात आले. त्याच्यावर सध्या उपचार सुरू आहे.
या घटनेची माहिती मिळताच घटनास्थळी ओतुर वनपरिक्षेत्र अधिकारी व्हि. एम. काकडे, आळेफाटा पोलीस स्टेशनचे पोलीस निरीक्षक यशवंत नलावडे, सहाय्यक पोलीस निरीक्षक सुनील बडगुजर यांनी भेट देऊन पंचनामा केला आहे.
