वाशिम जिल्हा प्रतिनिधी
महाराष्ट्र संदेश न्युज ! ऑनलाईन वाशिम:- जिल्ह्यातून एक खळबळजनक घटना समोर आली आहे. येथील धुंमका गावात जादूटोणा करत असल्याच्या संशयावरून एका 50 वर्षीय महिलेवर जीवघेणा हल्ला करत अमानुष मारहाण करण्यात आल्याची घटना समोर आली आहे. गावातील दोन महिला आणि तीन पुरुषांनी मिळून हे कृत्य केल्याचा आरोप जखमी महिलेने केला असून मारहाण करणाऱ्या कुटुंबातील एका तरुणीला जादूटोणा केल्याचा संशय मारहाण करणाऱ्यांनी केला होता. त्या कारणावरून घरी कुणी नसल्याचा फायदा घेत घरी एकटी महिला असल्याचे पाहून हि मारहाण करण्यात आलीय.
महिला गंभीर रुग्णालयात उपचार सुरु: धुंमका गावात जादूटोण्याच्या संशयावरून पिढीत महिलेला लोखंडी रॉड, लाठीकाठी व चाकूने प्राणघातक हल्ला केल्याचा आरोप जखमी महिलेने केला आहे. जखमी महिलेवर सध्या वाशिमच्या एका खाजगी रुग्णालयात उपचार सुरु आहेत. तसेच महिलेचे दोन्ही हाताचे हाड आणि पायाचे हाड हि तोडण्यात आल्याची माहिती पुढे आली आहे. दरम्यान, या घटनेची माहिती पोलिसांना देण्यात आली असून अनसिंग पोलिसात या प्रकरणाची तक्रार दाखल करण्यात आली आहे. मात्र अद्याप या प्रकरणातील आरोपी मात्र फरार असून पोलीस या प्रकरणाची सखोल चौकशी करीत आहे.
