देवेंद्र सिरसाट, हिंगणा तालुका प्रतिनिधी
नागपूर:- नागपूर जिल्हातून एक खाजगी बसचा भीषण अपघात झाल्याची घटना समोर आली आहे. जिल्ह्यातील हिंगणी-सेलू मार्गावरील पेंढरी जवळ एक खाजगी बस उलटली. या बसमध्ये अनेक प्रवासी होते. त्यापैकी अनेक प्रवासी गंभीर जखमी झाल्याची माहिती मिळतेय. अजून पर्यंततरी कुठलीही जीवितहानी झाली नसल्याची महाराष्ट्र संदेश न्युजला मिळाली
एक खाजगी बस प्रवासी घेऊन नागपूर वरून हिंगणीमार्गे वर्धाकडे निघाली ही बस पेंढरी घाटातील वळणावर चालकाचे नियंत्रण सुटल्याने हा अपघात घडल्याची प्राथमिक माहिती मिळतेय. पोलिसांनी घटनास्थळी पोहचत जखमींना रुग्णवाहिकेच्या मदतीने रुग्णालयात रवाना केलंय. पुढील तपास पोलिसांकडून केला जातोय.
हा अपघात इतका भीषण होता, की अपघातग्रस्त बस रस्ता सोडून एका बाजूला पूर्णपणे कलंडली होती. ज्या बाजून प्रवास बसमध्ये चढतात तोच भाग खालच्या बाजूला गेल्यानं प्रवासी बसच्या आतमध्ये एकाएकी अडकले गेले होते. या अपघातामुळे प्रवाशांची एकच घाबरगुंडी उडाली होती.
भरधाव वेगामुळे खासगी बस चालकाचं वळणावर नियंत्रण सुटलं आणि हा अपघात घडला असावा, अशी शंका घेतली जातेय. या अपघाताची पोलिसांनी नोंद केली असून पुढील बचावकार्य केलं जातंय.
अपघातानंतर अनेक प्रवासी हे जमिनीवर कोसळल्याचं दिसून आलंय. काहीच मदत मिळत नसल्यानं प्रवाशांनी अपघातानंतरचं अंगावर काटा आणणार दृश्यं कॅमेऱ्यात कैद केलं आहे. यामध्ये एका शेताच्या मळ्यात बस पलटी झाल्याचं दिसतंय. या बसच्या काचाही तुटल्यात. तसंच बसच्या पुढच्या चाकांनाही जबर मार बसल्याचं दिसून येतंय.
या अपघातातील इतर प्रवाशांची मदत करण्यासाठी पोलीस पथक घटनास्थळी दाखल झालं. सध्या या ठिकाणी बचावकार्य केलं जातंय. दरम्यान, अनेक प्रवाशांना मुका मार लागला असून काही प्रवासी किरकोळ जखमी झालेत. दरम्यान, या अपघातामुळे अनेकजण धास्तावलेत. थोडक्याच वाचल्यानं बसमधील अनेक प्रवाशांनी सुटकेचा निश्वास सोडलाय.
