रायगड जिल्हा प्रतिनिधी
महाराष्ट्र संदेश न्युज ! ऑनलाईन रायगड:- पोलीस म्हटल की चोरी, हत्या, संपत्तीचे रक्षण करणारे पण याच पोलिसांनी कुंपणानेच शेत खाल्याची खळबळजनक घटना समोर आली आहे. येथील अलिबाग-पेण मार्गावर असणाऱ्या तिनविरा परीसरात दरोडा टाकून लुटण्यात आले. ही घटना 9 फेब्रुवारीला घडली असून या दरोड्यात चक्क पोलिसांनी सहभाग असल्याच्या माहितीने खळबळ उडाली आहे. या दरोडेखोराकडून आतापर्यंत पोलीसांनी 1 कोटी 50 लाख रुपयांची रोकड जप्त केली आहे. पोलिस तपासानंतर सापडलेल्या दरोडेखोरांमध्ये आश्चर्यची बाब म्हणजे या पाच आरोपींमध्ये 3 आरोपी हे रायगड पोलीस विभागातील पोलीस कर्मचारी असून उर्वरित 2 आरोपी हे अलिबाग मधील असल्याची माहिती मिळाली आहे.
या दरोड्यात 5 आरोपी असून त्यात 1) समीर म्हात्रे पोलीस हवलदार, मुरूड पोलीस स्टेशन, 2) विकी साबळे पोलीस हवलदार अलिबाग 3) हनुमंत सूर्यवंशी पोलीस हवलदार अलिबाग 4) समाधान पिंजारी मुख्यआरोपी 5) दीप गायकवाड हे असून 3 आरोपीला पोलिसांनी बेड्या ठोकल्या असून 2 आरोपी फरार झाले असून पोलीस त्यांचा शोध घेत आहे.
काय आहे हे प्रकरण?: आरोपी समाधान पिंजारी याने नागपूरमधील सोन्याचे व्यापारी नामदेव हुलगे यांना कमी पैशात सोने मिळवून देण्याचे आमिष दाखवले. शंकर कुळे याच्याकडे 7 किलो सोने असून ते 5 कोटी रुपयांमध्ये देतो, असे पिंजारीने हुलगे यांना सांगितले. एवढ्या स्वस्तात सोने मिळत असल्याने पाहून 1 कोटी 50 लाख रुपये घेऊन हुलगे, दीप गायकवाड आणि इतर मंडळी कारमधून अलिबागकडे निघाले. अलिबाग-पेण मार्गावर तिनविरा धरणाजवळ आल्यावर गायकवाडने कार थांबवली. पुढे पोलीस आले आहेत असे सांगितले. काही वेळात मोटरसायकल वरून पोलीस युनिफॉर्ममध्ये समीर परशुराम म्हात्रे आणि विकी सुभाष साबळे आले. त्यांनी गाडी तपासायची आहे, असे सांगून हुलगे आणि त्यांच्या सहकाऱ्याला गाडीतून उतरण्यास सांगितले. त्या दोघांनी पैशांची बॅग गाडीत ठेवली आणि ते गाडीतून बाहेर आले. ही घटना 4 फेब्रुवारी दुपारी साडेचारच्या सुमारास घडली.
सहकाऱ्यासह हुलगे गाडीतून उतरल्यानंतर दीप गायकवाड सुसाट वेगाने कार घेऊन पनवेलच्या दिशेने निघून गेला. त्याला पकडतो असे सांगून दोन्ही पोलीस मोटरसायकलने गाडीच्या मागून निघून गेले. या सर्व प्रकाराने हुलगे आणि त्यांचा सहकारी चक्रावून गेले. त्यानंतर हुलगे आणि त्यांचा सहकारी पोयनाडच्या दिशने चालत असताना पाठलाग करणाऱ्या पोलिसांची मोटरसायकल अलिबागच्या दिशेने जाताना दिसली.
याप्रकरणी हुलगे यांनी पोयनाड पोलीस स्टेशन मध्ये तक्रार केल्यानंतर पोलिसांनी गुन्हा दाखल केला. मात्र, दुसऱ्या दिवशी 5 फेब्रुवारी रोजी एका हवालदाराने फिर्यादी हुलगे यांना 2 कोटी रुपये घेऊन तातडीने पोलीस स्टेशन मध्ये येण्याची धमकी दिली. त्यामुळे हुलगे यांनी 7 फेब्रुवारी रोजी रायगड पोलीस अधीक्षकांकडे तक्रार दाखल केली. ही घटना कळताच पोलीस अधीक्षक सोमनाथ घार्गे यांच्या मार्गदर्शनाखाली स्थानिक गुन्हे अन्वेषण शाखेचे पोलीस निरीक्षक बाळासाहेब खाडे यांच्या नेतृत्वाखाली पथक तयार करण्यात आले. या पथकाने चौघांना बेड्या ठोकल्या आहे. त्यामध्ये समीर म्हात्रे, विकी साबळे, समाधान पिंजारी आणि दीप गायकवाड यांचा समावेश आहे. पोलिसांनी त्यांच्याकडून दीड कोटी रुपये जप्त केले आहेत. तर पाचव्या आरोपीला शोध सुरू आहे. सध्या या प्रकरणाचा अधिक तपास पोलीस करत आहे.
