मुकेश चौधरी कार्यकारी संपादक
महाराष्ट्र संदेश न्युज ! ऑनलाईन हिंगणघाट:– स्कूल ऑफ स्कॉलर्स, हिंगणघाट येथे दिनांक 12 एप्रिल, 2025 रोजी पालकांसाठी “किशोरवयीन मुलांचे मानसिक आरोग्य आणि संवाद कौशल्य” या विषयावर विशेष कार्यशाळेचे आयोजन करण्यात आले होते. या कार्यशाळेचे प्रमुख मार्गदर्शक म्हणून नागपूरचे प्रसिद्ध मानसोपचारतज्ञ डॉ. राकेश कृपलानी उपस्थित होते. किशोरवयीन मुलांच्या मानसिक स्थिती, बदलती वर्तणूक, संवादातील अंतर, आत्मभान, तणाव व्यवस्थापन अशा अनेक मुद्द्यांवर त्यांनी पालकांशी संवाद साधला. पालकांनी आपल्या मुलांच्या भावनिक गरजा समजून घेणे, त्यांच्यावर विश्वास ठेवणे व सकारात्मक संवाद साधणे किती महत्त्वाचे आहे, याचे स्पष्ट व प्रभावी मार्गदर्शन डॉ. राकेश कृपलानी यांनी केले.
यावेळी शाळेच्या मुख्याध्यापिका शिल्पा चव्हाण यांनी आपल्या मनोगतात सांगितले की “किशोरवयीन मुले ही आपल्या जीवनातील सर्वात संवेदनशील टप्प्यातून जात असतात. या टप्प्यावर योग्य मार्गदर्शन आणि समजूतदार पालकत्व मिळाल्यास, त्यांचा व्यक्तिमत्व विकास सकारात्मक दिशेने होतो. शाळेची भूमिका केवळ शैक्षणिक नाही, तर विद्यार्थ्यांच्या मानसिक आणि भावनिक प्रगतीसाठीही आमचा सक्रिय सहभाग असतो.” पालक, शिक्षक व शाळा यांच्यातील त्रिकोण जर मजबूत असेल, तर मुलांना एक सकारात्मक आणि संरक्षित वातावरण मिळते.
शाळेचे सह- प्रशासकीय अधिकारी श्री प्रदिप जोशी यांनीही पालकांशी संवाद साधताना सांगितले की, किशोरवयीन काळात प्रत्येक मुलाला समजून घेणे ही आपली सामूहिक जबाबदारी आहे.
या कार्यशाळेला पालकांचा मोठ्या प्रमाणावर सहभाग लाभला. अनेकांनी आपल्या प्रतिक्रिया देताना असे नमूद केले की, ही कार्यशाळा अत्यंत उपयुक्त आणि मार्गदर्शक ठरली.शाळेच्या या उपक्रमाचे सर्व स्तरातून कौतुक करण्यात आले.
