विश्वनाथ जांभुळकर एटापली तालुका प्रतिनिधी मोबाईल क्र. 9421856931
गट्टा :- या परिसरातील शिक्षण क्षेत्रासाठी अत्यंत आनंदाची व अभिमानाची बातमी म्हणजे जिल्हा परिषद उच्च प्राथमिक शाळा गट्टा येथे इयत्ता 9 वी व 10 वी वर्गांना अधिकृत मंजुरी प्राप्त झाली आहे. आज दिनांक 22 मे 2026 रोजी गडचिरोली जिल्ह्याचे शिक्षण अधिकारी बाबासाहेब पवार यांनी यासंदर्भातील आदेश जारी केले.
गेल्या अनेक दिवसांपासून गट्टा परिसरातील विद्यार्थ्यांना उच्च माध्यमिक शिक्षणासाठी दूरच्या ठिकाणी जावे लागत होते. विद्यार्थ्यांची होणारी गैरसोय लक्षात घेऊन गावातील नागरिक, पालक व शाळा व्यवस्थापन समिती यांनी सातत्याने पाठपुरावा केला. त्यांच्या प्रयत्नांना अखेर यश मिळाले असून शाळेत इयत्ता 9 वी व 10 वी सुरू करण्यास मंजुरी देण्यात आली आहे.
या महत्वपूर्ण कार्यासाठी श्री सैनुजी गोटा संचालक आदिवासी विविध सहकारी महामंडळ नाशिक यांनी अथक परिश्रम घेतले तसेच श्री गोविंद शहा, श्री संदीप गोठा तसेच शाळा व्यवस्थापन समिती गट्टा येथील सर्व सदस्य, गावकरी व शिक्षणप्रेमी नागरिक यांनी मोलाचे सहकार्य केले. त्यांच्या एकजुटीमुळेच आज गट्टा परिसरातील विद्यार्थ्यांसाठी शिक्षणाचे नवीन दालन खुले झाले आहे.
शाळा प्रशासनाच्या वतीने परिसरातील जास्तीत जास्त विद्यार्थ्यांनी इयत्ता 9 वी व 10 वी मध्ये प्रवेश घ्यावा, असे आवाहन करण्यात आले आहे. या निर्णयामुळे ग्रामीण व आदिवासी भागातील विद्यार्थ्यांना आपल्या गावातच दर्जेदार शिक्षणाची सुविधा उपलब्ध होणार असून पालकांमध्येही समाधानाचे वातावरण निर्माण झाले आहे.
गट्टा परिसरातील नागरिकांनी या निर्णयाबद्दल आनंद व्यक्त करत शिक्षण विभागाचे तसेच सर्व सहकार्य करणाऱ्या मान्यवरांचे आभार मानले आहेत.