नितेश पत्रकार, झरी तालुका प्रतिनिधी
यवतमाळ:- जिल्हातील अनेक तालुक्यात बदलत्या वातावरणामुळे रुग्णांची संख्या मोठ्या प्रमाणावर वाढली आहे. याचा फायदा घेत ग्रामीण भागात काही पानटपऱ्यांसह किराणा दुकानात सुद्धा औषधी गोळ्यांची विक्री होत असल्याची धक्कादायक बाब समोर आली आहे.
मागील काही दिवसांपासून विविध आजारांच्या रुग्णांची संख्या वाढल्याने सरकारी व खासगी रुग्णालयात मोठ्या प्रमाणात गर्दी दिसत आहे. या परिस्थितीत सर्वांवर उपचार करण्यासाठी शासकीय आरोग्य यंत्रणा तोडकी पडत असल्याचे दिसते. त्याच बरोबर तालुक्यातील ग्रामीण भागात बोगस डॉक्टरांचा सुळसुळाट वाढला आहे. कुठलीच वैद्यकीय पदवी नसलेल्या डॉक्टरांनी व्यवसाय जोरात चालविला आहे. हे कमी होते म्हणून, ग्रामीण भागात किराणा दुकान व पानटपरीमध्ये सुद्धा विविध आजारांवरील औषधांची विक्री सुरू झाली आहे. कोणतेही वैद्यकीय ज्ञान व परवाना नसताना हे दुकानदार ताप, सर्दी, हातपाय दुखणे, हागवण, थंडी वाजून ताप येणे, डोके दुखणे आदी आजारांवरील औषधी उपचारासाठी गोळ्या देतात. शिवाय या दुकानातून मुदत संपलेल्या औषधांची विक्री होण्याचा धोका आहे. आरोग्य विभागाने पोलिसांच्या मदतीने या घटनांना प्रतिबंध घालण्याची गरज आहे. ज्या मेडिकल स्टोअरमधून औषधी गोळ्यांचा साठा विकण्यासाठी दिला जातो, त्यांच्यावर सुद्धा कारवाईची गरज आहे.
रुग्णांनी डॉक्टरांच्या सल्ल्याशिवाय कोणतेही औषध घेऊ नये. शिवाय औषध शासनमान्य मेडिकल स्टोअर्समधूनच घ्यावे. औषधे विकणाऱ्या पानटपरी व किराणा दुकानदारांवर नियमानुसार तात्काळ कारवाई करण्यात येईल.
–मोहन गेडाम (तालुका आरोग्य अधिकारी)
