युवराज मेश्राम विदर्भ ब्यूरो चीफ
नागपूर:- परत एक दा वेगळ्या विदर्भाचे आंदोलन पेटले आहे. काल वेगळ्या विदर्भासाठी लढणाऱ्या कार्यकर्त्यांनी केंद्रीय मंत्री नागपूरचे खासदार नितीन गडकरी यांच्या कार्यालयात आंदोलने करून वेगळ्या विदर्भाचा आवाज बुलंद केला.
सत्तेत येण्यापूर्वी भारतीय जनता पक्षाच्या नेत्यांनी वेगळ्या विदर्भाच्या मुद्द्यावर लोकांकडून मतं मिळवली. मात्र सत्तेत आल्यावर या नेत्यांना वेगळ्या विदर्भाच्या आश्वासनांचा विसर पडला आहे. त्याची आठवण करुन देण्यासाठी विदर्भ राज्य समितीच्यावतीने नागपुरात केंद्रीय मंत्री नितीन गडकरी यांच्या खामला येथील जनसंपर्क कार्यालयासमोर आंदोलन करण्यात आले.
विदर्भवाद्यांना आंदोलनाची परवानगी नसल्याचे सांगत पोलिसांनी आंदोलकांची समजूत घालण्याचा प्रयत्न केला. मात्र तरी आंदोलन ऐकण्याच्या तयारीत नसल्याचे दिसून आले. केंद्रीय मंत्री नितीन गडकरी सध्या गुवाहाटीला असल्याने त्यांची भेट आंदोलकांना घेता आली नाही.
सत्ता मिळविण्यासाठी नेत्यांकडून वेगळ्या विदर्भाच्या नावावर जनतेची दिशाभूल करण्यात आली आहे. आम्ही सत्तेत आलो तर वेगळा विदर्भ राज्य तयार करु असे आश्वासनही नेत्यांनी दिले होते. या आश्वासन देणाऱ्या नेत्यांमध्ये केंद्रीय मंत्री नितीन गडकरी यांचाही समावेश होता. आपल्या विसर पडलेल्या आश्वासनांची आठवण करुन देण्यासाठी विदर्भ राज्य समितीच्यावतीने विदर्भातील खासदारांच्या कार्यालय आणि घरांवर आंदोलन करण्यात येणार असल्याचे यावेळी आंदोलकांनी सांगितले.
आक्रमक आंदोलकांना समजूत घालण्याचे प्रयत्न अपयशी ठरल्यावर आंदोलकांनी केंद्रीय मंत्री नितीन गडकरी यांच्या जनसंपर्क कार्यालयाच्या पायऱ्यांवर ठिय्या मांडला. घोषणा देऊन थकलेल्या आंदोलकांना नितीन गडकरी यांच्या कार्यालयातील कर्मचाऱ्यांनी पाण्याची व्यवस्था केली. मात्र, पाणी पिल्यानंतर परत विदर्भवादी आंदोलकांनी नितीन गडकरी यांच्या विरोधात पायरीवर बसून घोषणाबाजी केली.
