✒️राज शिर्के, मुंबई (पवई) प्रतिनिधी
महाराष्ट्र संदेश न्युज ! ऑनलाईन इंदोर, 1 मार्च:- विवाहित महिलेने 6 महिन्यांच्या बाळासमोरच आत्महत्या केल्याचा धक्कादायक प्रकार घडला आहे. 25 वर्षांची ही महिला मध्य प्रदेशच्या इंदूरमधल्या विजयनगर भागात राहत होती. या महिलेने स्वत:च्या 6 महिन्यांच्या बाळासमोरच स्वत:ला फासावर लटकवून घेतलं. या घटनेची माहिती मिळताच परिसरातल्या नागरिकांनाही धक्का बसला. मिळालेल्या माहितीनुसार आत्महत्या करणाऱ्या महिलेने नवऱ्याला पिझ्झा आणायला बाहेर पाठवलं, पण नवरा जेव्हा पिझ्झा घेऊन आला तेव्हा त्याला पत्नी फासाला लटकलेली आढळली.
पोलीस सध्या सुसाईड नोट मिळते का याचा तपास करत आहेत. हा प्रकार इंदूरच्या विजय नगर भागात स्कीम नंबर 78 स्वर्ण बाग कॉलनीतला आहे. या भागात राहणारी नवविवाहिता साक्षी पाठकने आपल्या घरामध्येच स्वत:ला फासावर लटकवून घेतलं. हा टोकाचा निर्णय घेताना महिलेचा मुलगा 6 महिन्यांचा होता. महिलेच्या घरच्यांनी तिच्या पतीवर गंभीर आरोप केले आहेत. एका वर्षाआधीच साक्षीने राजा पाठक नावाच्या तरुणाशी प्रेमविवाह केल्याचं बोललं जात आहे. हे दोघं प्रायव्हेट कंपनीमध्ये नोकरी करत होते.
साक्षीच्या आत्महत्येचं कारण अज्ञात आहे, पोलिसांना अजून सुसाईड नोटही मिळाली नाही, पण महिलेच्या माहेरच्यांनी तिचा पती राजावर गंभीर आरोप केले आहेत. मला रात्री 12.30 वाजता साक्षीचा मृत्यू झाल्याचा फोन आला, पण त्याआधी रात्री 9.15 वाजता तिने मला कॉल केला होता, त्यावेळी ती माझ्याशी नीट बोलली. हे पाऊल उचलण्याइतकी ती कमजोर नव्हती. ती शिकलेली आणि समजूतदार मुलगी होती, असं साक्षीची बहिण म्हणाली आहे.
मे महिन्यामध्ये आईचं श्राद्ध होतं, त्यासाठी ती जबलपूरला येणार होती. आम्ही तिन्ही बहिणी तिकडे भेटणार होतो, असा दावाही साक्षीच्या बहिणीने केला आहे. दुसरीकडे आपण पिझ्झा आणण्यासाठी गेलो तेव्हाच साक्षीने टोकाचं पाऊल उचलल्याचं तिच्या नवऱ्याने पोलीस तपासात सांगितलं आहे. साक्षीच्या नातेवाईकांचे आरोप आणि महिलेच्या मोबाईल फोनचा तपास केल्यानंतरच तिच्या आत्महत्येचं कारण स्पष्ट होईल. साक्षी एका कॉल सेंटरमध्ये काम करत होती, जवळपास दीड वर्षापूर्वी तिचं राजासोबत लग्न झालं होतं. साक्षीचा नवराही प्रायव्हेट कंपनीमध्ये काम करत आहे.
