उषाताई कांबळे, सांगली शहर प्रतिनीधी
महाराष्ट्र संदेश न्युज ! ऑनलाईन सांगली:- येथून लाचखोरीची एक खळबळजनक घटना समोर आली होती. त्यात सांगली लाच लुचपत प्रतिबंधक विभागाने लाचखोर प्रभारी अग्नीशमन अधिकाऱ्यावर धडक कारवाई करत लाच घेताना अटक केली. त्यामुळे संपूर्ण प्रशासनात एकच खळबळ माजली होती.
फायर आडिट झाल्यानंतर अंतिम ना हरकत प्रमाणपत्र देण्यासाठी सव्वा लाखांची लाच घेणाऱ्या सांगली, मिरज आणि कुपवाड महानगर पालिकेचा लाचखोर प्रभारी अग्नीशमन अधिकारी विजय पवार यांच्या घरात लाखोचे घबाड सापडले आहे त्यात 7 लाख 1 हजार 600 रूपयांची रोख रक्कम सापडली आहे. इतकी मोठी रक्कम कुठून आली ? याचा शोध सुरू आहे. पण लाच लुचपत प्रतिबंधक विभागाच्या वतीने ही रक्कम जप्त करण्यात आली आहे. यावेळी काही कागदपत्रेही जप्त करण्यात आल्याची माहिती लाचलुचपत प्रतिबंधक विभागाचे पोलिस उपअधीक्षक संदीप पाटील यांनी दिली.
सांगली, मिरज आणि कुपवाड महापालिकेचा प्रभारी अग्नीशमन अधिकारी विजय पवार याला मंगळवारी 1 लाख 25 हजार रूपयाची लाच घेताना रंगेहात अटक करण्यात आली होती. पवार याला अटक केल्यानंतर लाचलुचपत प्रतिबंधक विभागाने त्याच्या सांगलीवाडीतील घरावर मंगळवारी रात्री उशीरा छापा टाकला. त्यावेळी त्याच्या घराची झडती घेण्यात आली होती त्यात 7 लाख 1 हजार 600 रूपयांची रोकड सापडली. त्याशिवाय काही आक्षेपार्ह कागदपत्रेही जप्त करण्यात आली आहे.
ना हरकत दाखल्यासाठी रकमेची मागणी
फायर सिस्टीम बसवणाऱ्या कंपनीला अंतिम ना हरकत दाखला देण्यासाठी पवार याने सुरुवातीला दीड लाख रूपये लाचेची मागणी केली होती. त्यानंतर सव्वा लाख रूपयांवर तडजोड झाल्या नंतर मंगळवारी संध्याकाळी सव्वा लाखांची लाच घेताना पवार याला रंगेहात पकडण्यात आले आहे. मंगळवारी रात्री उशीरा त्याच्या घराची झडती घेतल्यानंतर मोठ्या प्रमाणात रोकड सापडली. काही कागदपत्रेही ताब्यात घेण्यात आली आहेत.
