संदीप सुरडकर नागपुर जिल्हा प्रतिनीधी
महाराष्ट्र संदेश न्युज ! ऑनलाईन नागपूर:- शहरातून एक खळबळजनक घटना समोर आली आहे. येथे एका भावाने आपल्याच बहिणीच्या प्रियकराचा चाकूने भोसकून निर्घृण हत्या केल्याची थरारक घटना मंगळवारी मध्यरात्री अजनी पोलीस स्टेशनच्या हद्दीतून समोर आली आहे. निखिल शाहू उके वय 28 वर्ष रा. अजनी असे हत्या करण्यात आलेल्या तरुणाचे नाव आहे. यावेळी अजनी पोलिसांनी पोलिसांनी निखिल शाहू उके याची हत्या करणाऱ्या तीन आरोपींना अटक केली.
पोलिसांनी दिलेल्या माहितीनुसार, मुख्य आरोपी हिमांशू याच्या बहिणीसोबत निखिल उके याचे प्रेमसंबंध होते. त्याची कुणकुण हिमांशूच्या कुटुंबापर्यंत पोहचली. बहिणीला मारहाण करून तिला प्रेमसंबंध तोडण्यास सांगितले. त्यानंतर निखिल याची समजूत घालून बहिणीपासून दूर राहण्यास सांगितले. यानंतर प्रेमसंबंध ठेवल्यास जीवे मारण्याची धमकी दिली होती. त्यानंतर काही महिने निखिलने संबंध तोडले होते.
मात्र, गेल्या महिन्यात पुन्हा भेटून लग्नाची तयारी करीत होता. त्यामुळे हिमांशूने मित्र अंकित ऊर्फ अन्नी नीलेश वाघमारे वय 24 वर्ष, सावित्रीबाई फुलेनगर आणि विशाल ऊर्फ बब्बू काल्या लक्ष्मण फुलमाळी वय 22 वर्ष, कौशल्यानगर यांना मदत मागितली. मंगळवारी निखिलला घरी बोलावले. तो घराजवळ पोहचताच दबा धरून बसलेल्या तिघांनीही चाकूने हल्ला केला. त्याचा तासाभरातच मृत्यू झाला. याप्रकरणी अजनी पोलिसांनी हत्याकांडाचा गुन्हा दाखल करून आरोपींना अटक केली. या हत्येचा पुढील तपास अजनी पोलीस स्टेशनचे पोलीस निरीक्षक करत आहे
