अकोला येथे मिळून आला महिला पोलीसांचा मृतदेह, घरातून येत होती दुर्गंधी..

अकोला जिल्हा प्रतिनिधी

महाराष्ट्र संदेश न्युज ! ऑनलाईन अकोला, दि.16 ऑगस्ट:- अकोला येथून एक खळबळजनक घटना समोर आली आहे. येथे एका महिला पोलिसाचा मृतदेह राहत्या घरात मिळून आल्याने एकच खळबळ उडाली आहे.

अकोला शहरातल्या सिटी कोतवाली पोलीस स्टेशनमध्ये कार्यरत असलेल्या एका पोलीस महिलेने एकटेपणाला कंटाळून जीवन यात्रा संपवली आहे. वृषाली सरगे असे मयत महिला पोलिसाचे नाव आहे. त्या गेल्या तीन वर्षापासून सिटी कोतवाली पोलीस स्टेशनमध्ये कर्तव्य बजावत होत्या. दोन दिवसापासून त्या कुणाच्याही संपर्कात नव्हत्या. अखेर आज सकाळी घरातून मोठ्या प्रमाणात दुर्गंधी येत असल्याने ही घटना उघडकीस आली आहे. वृषाली सरगे यांच्या पतीचे आधीच निधन झाले होते. त्यांना काही मूलबाळही नव्हते. त्या एकट्या राहत होत्या त्यातूनच त्यांनी हे पाऊल उचलले आहे. यावेळी मृतक वृषालीच्या मृतदेहाचा पंचनामा करून पोलिसांनी मृतदेह शवविच्छेदनासाठी रुग्णालयात पाठवला आहे.

प्राप्त माहितीनुसार, वृषाली सरगे यांचे पती पोलीस दलात नोकरी करत होते. पतीचे अचानक निधन झाल्यानंतर पतीच्या जागी अनुकंपावर वृषाली यांना नोकरी लागली होती. गेल्या तीन वर्षापासून त्या अकोला शहरात कार्यरत आहेत. त्यांना मूलबाळही नव्हते. तसेच नातेवाईकही फारसे संपर्कात नव्हते. त्यामुळे वृषाली या एकट्या पडल्या होत्या. एकटेपणाला कंटाळून अखेर त्यांनी गीता नगरमधील बेला विस्ता अपार्टमेंटमधील राहत्या घरी हे टोकाचे पाऊल उचलले.

सुसाईड नोट आली समोर..
वृशाली यांनी मृत्यूपूर्वी सुसाईड नोट लिहून ठेवली होती त्यात एकटेपणाला कंटाळून जीवन संपवत असल्याचे म्हटले आहे. तसेच आपला मृतदेह नातेवाईकांच्या ताब्यात न देता जिल्हा सामान्य रुग्णालयाला देण्यात यावा असेही म्हटलं आहे. या घटनेमुळे परिसरात एकच खळबळ उडाली आहे. या प्रकरणाचा पुढील तपास जुने शहर पोलीस करत आहेत.