नितीन दत्ताराम शिंदे, मुंबई महानगर प्रतिनिधी
महाराष्ट्र संदेश न्युज ! ऑनलाईन ठाणे: दि. २२ ऑगस्ट:- तंबाखूमुक्त हर्बल हुक्का पार्लर सुरु करायची उच्च न्यायालयाची परवानगी असताना देखील ठाणे शहरात तंबाखूमुक्त हर्बल हुक्का पार्लर सुरु करता येत नसल्याने ठाणे शहरातील सर्व हॉटेल व्यावसायिकांनी पोलीस आयुक्त जयजित सिंग व सह पोलीस आयुक्त दत्ता कराळे यांची भेट घेतली आहे.
ठाण्यातील काही संघटनांच्या मागण्यांनंतर अनेक हुक्का पार्लर शहारात बंद करण्यात आले आहेत. तंबाखूमुक्त हर्बल हुक्का पार्लर सुरू ठेवण्याच्या सूचना स्वतः उच्च न्यायालयाने दिल्यानंतर हॉटेल व्यवसायिकांनी सुटकेचा श्वास सोडला होता पण तसे काही झाले नाही.
ठाणे पोलीस मात्र तंबाखू मुक्त हर्बल हुक्का पार्लर सुरू करण्यासाठी कोणताच सकारात्मक प्रतिसाद देत नसल्याने हॉटेल व्यवसायिकांमध्ये मोठी नाराजी पसरली आहे. ठाणे पोलिसांच्या या भूमिकेमुळे अडचणीत अडकलेल्या हॉटेल व्यवसायिकांनी उच्च न्यायालयाने हर्बल हुक्का पार्लर चालवण्यासाठी दिलेल्या परवानगीचा दाखला देत मुंबईप्रमाणे ठाण्याच्या धरतीवर देखील हर्बल हुक्का पार्लर चालवण्यासाठी परवानगी द्यावी अशी मागणी पोलीस आयुक्तांकडे केली आहे. व्यवसाय बंद असल्याने अडचणीत व कर्जाच्या डोंगरात अडकलेल्या हॉटेल व्यवसायिकांना तंबाखूमुक्त हर्बल हुक्का पार्लर सुरू करण्याची परवानगी मिळाली तर त्यांच्या अडचणी काही प्रमाणात कमी होतील असा विश्वास या सर्व हॉटेल व्यवसायांच्या असोसिएशनकडून व्यक्त करण्यात आला आहे. या तंबाखू मुक्त हर्बल हुक्क्याचा मानवी शरीरावर व आरोग्यावर कोणताच दुष्परिणाम होत नाही.
मुंबईत जर तंबाखू मुक्त हर्बल हुक्का पार्लर सुरू होऊ शकतो तर मुंबईपासून काही मिनिटांवर असणाऱ्या ठाण्यात का नाही असा संतप्त सवालही ठाणे शहरातील हॉटेल व्यवसायिक विचारत आहेत.
